Sint Maarten lo ricibi mas cu 10 miyon euro fo’i Hulanda

Sint Maarten lo ricibi e aña aki 24 miyon florin antiano (ANG) ainda, cual ta 11,3 miyon euro, na sosten financiero di Hulanda. Conseho di Minister di Reino a dicidi esey awe. Gobierno di Sint Maarten por paga e cuentanan coriente cu e placa.

E suma di sosten di likides ta consisti di un sosten di 14 miyon ANG den e di tres cuartal y 10 miyon ANG pa e ultimo tres luna di e aña aki. 

E ayudo financiero otorga awo, ta parti di e palabracionnan cu a haci durante di e pandemia di corona. Hulanda e tempo ey a sali yuda e paisnan cu mas di un miljard euro na prestamo sin interes, banda di tur tipo di ayudo medico y sosten cu por ehempel pakete di cuminda pa medio di Cruz Cora. 

Tambe a palabra cu e pais lo no mester cumpli cu e normanan presupuestario den 2020, 2021 y 2022. Esey ta bisa cu no tin mag di gasta mas cu loke ta drenta. Pa eventual buraco den e presupuesto cu surgi pa e motibo ey, bou di condicion, e paisnan tabatin mag di pidi extra sosten den forma di prestamo sin interes. Sint Maarten ta haci uzo di esey awor pa tanto e di tres como e di cuater cuartal di 2022.

Corsou y Aruba no a pidi sosten di likides. Awor cu segun expectativa e pandemia di corona a drenta den un fase nobo, y cu economia di Aruba, Corsou y Sint Maarten ta lantando cabes atrobe, Conseho di Minister di Reino ta spera cu tur tres isla no tin mester di placa extra di Hulanda.