Sindicato di Polis: 2022 no a bay dje bon ey pa polis

“2022 a bay relativamente bon pa hopi, pero no dje bon ey pa nos,” ta loke cu presidente di Sindicato di Polis (SPA), Rodney Solognier a bisa, agregando cu a priminti hopi promesa n’e sindicato como representante di Cuerpo Policial, no a cumpli te cu ainda.

Ta wardando ainda cierto cosnan, manera por ehempel e vestnan cu ta wardando pa hopi tempo, e uniformnan nobo cu ta wardando cu ainda no a yega. Carnaval ta den porta y manera cu sa, e situacion ta hopi critico riba caya y e agentenan ainda no sa nada di locual ta vest.

Rodney Solognier: “Nos ta spera cu pa logicamente cuminsamento di carnaval nos por logra haya eseynan alsnog, pasobra ta algo hopi importante cu nos miembronan tin mester.”

E PARTINAN CU A RESALTA

E ta sigui bisa cu aworaki tin algo cu ta yama ‘presentatie management’, cual nan a haya charla di dje. Poco dia ey, a pidi encarecidamente, hunto cu e otro sindicatonan pa por haya un oportunidad mas pa por papia y delibera riba dje.

A pidi cierto documentonan pa por pasa riba dje, pa ta miho informa y e ultimo reunion cu a sinta cu DRH, a bisa cu nan no por comparti e informacion ey cu nan.

Dos dia pasa a haya un concept di locual t’e presentatie management cu nan kier pone den werking pa dia prome di januari cu en realidad e no ta mucho amistoso p’e ambtenaarnan.

PROMOCION

Promocion of bevordering tabata un topico pa 2022. Esey tabata un problema cu nan tabatin cuestion di 5%. Ta bon mes na ultimo a bin na un comprondemento cu DRH cu tur lo ta regla. E promocionnan tabata drentando laat, pero ainda falta hopi mas pa trek bij.

Segun Solognier ta spera cu pa 2023 tur cos lo sali bon y no manera e aña aki cu hopi colega a haya nan den problema cu nan Landsbesluit.

CONSEHO LEGAL

Un di e casonan mas bringa tabata e ‘ziektebeleid’. Practicamente tur colega a gana nan caso, pero DRH no a cumpli cu e sentencia di hues.

POLISNAN CU NO TA MIEMBRO

Solognier a splica cu ainda tin polis cu no ta miembro ainda di SPA. Tabatin algun den pasado tabatin nan disgusto cu e sindicato. Hopi biaha nan ta splica cu e sindicato no ta bezig. “Si nos ta bezig. No ta tur cos ta di show tampoco. Pero nos ta trahando dia aden dia afo y ta bringando pa hopi cos importante p’e Cuerpo Policial. Un di nan sigur t’e cuestion di pensioen.

PERSPECTIVA PA 2023

Perspectiva pa 2023 pa sindicato SPA, ta pa sigui lucha p’e miembronan, vooral e problemanan cu ta andando ainda cu a warda hopi tempo riba minister di husticia, Rocco Tjon pa por a yuda cu e sistema, te ainda no a soluciona. Eseynan lo bolbe trece dilanti.

Tin tambe e problema di schimmel cu ainda tin na warda di Playa, cual ta un di nan cu ainda tin hopi problema. A trece mashin pa combati esaki pero te ainda e ta e mesun problema. Unabes cu tin schimmel tin problema y despues tin problema cu e ziektebeleid cu tin cu bringa den corte. Tur cos ta un problema cu tin un ‘snowball effect’.

SALARIO Y RECORTE

Solognier a comenta cu gobierno a priminti cu pa dia prome di januari 2023 no ta bay tin recorte mas, cu nan lo bay haya nan vakantie uitkering completo y nan prima completo.  Afortunadamente a bisa dia prome di januari y tin e presupuesta, segun a splica, den budget di gobierno. Pero lo mira esaki te cu juni ora cu haya e vakantieuitkering. Awo tin cu warda te cu juni pa por mira cu en berdad esey ta loke nan ta primintiendo.

DESEO PA PUEBLO

Solognier: “Sindicato di polis di Aruba ta desea henter pueblo di Aruba, specialmente e miembronan, un feliz aña nobo. Cuida boso mes, cuida curpa. Bay rustig, pasobra awendia bo no sa kico ta verwacht bo aki na Aruba.”