Sindicato a desconseha pero Gobierno a cumpra crash-truck bieu toch!

Den un carta manda dia 20 di februari 2021, Sindicato di Bomberonan di Aruba (SINBA) a desconseha Minister Andin Bikker pa cumpra dos crash-truck bieu for di e compania KENBRI Fire Fighting BV di Hulanda. E tempo ey, despues di a reuni dia 11 di februari 2021 cu e sindicato, Minister Bikker a confirma cu e lo para e compra, riba conseho di e bomberonan, pero na final a dicidi di “dal bay” toch cu e compra.

E tempo ey, e sindicato a skirbi e mandatario cu e gastonan mara na drecha e trucknan aki ta asina halto y no tin ningun garantia cu nan lo traha bon. Es mas, ta trucknan cu ta “afgekeurd” pa traha na aeropuerto di Hulanda, pues con por ta cu aki na Aruba si nan por traha anto? Es mas, ta lamenta cu e sindicato, cu conoce e trabou di bombero, a manda un conseho bon motiva pa e mandatario, pero e ultimo a opta pa pone e conseho un banda y cumpra e trucknan toch. E sindicato ta papia di “onverantwoorde aankoop”.

Sindicato SINBA a premira cu despues lo bisa cu ta e bomberonan mes a pidi pa cumpra e crash-trucknan aki y como tal, a haci sabi, pues a manda “preto riba blanco” cu nan a desconseha e minister y cu t’e a opta pa bay contra tur conseho y cumpra e wacharacanan aki toch.