Simon Waslander: Sin un kwijtschelding Aruba su panorama economico lo ta bira pio di loke e ta actualmente 

Executive Summary

Den e articulo publico aki mi persona kier haci un apelacion den moda urgente y publico pa ambos gobierno di Hulanda y esun di Aruba, pa Hulanda duna Aruba kwijtschelding di e debenan cu pais Aruba a acumula durante pandemia di Corona.

Hulanda mester compronde duidelijk, cu Aruba a yega na un nivel total di debe cu simplemente no por paga den forma real si corigi pa inflacion. Ta forsa pais Aruba pa bay un rumbo pa purba paga un debe impagabel bek den forma di mas belasting y heffingnan enorme, aplica door di e trendnan macro-economico hopi negativo tanto den inflacion como den crecemento economico.

Sin un kwijtschelding di debe, cua gobierno cu bin na mando lo tin un tarea imposibel, cu lo tin un consecuencia pa isla di Aruba riba termino largo. E poblacion di Aruba su poblacion lo sigui wak nan poder di compra baha. Ya caba e bestaansminimum segun Oficina Central di Estadistica di Aruba ta rond di 2500 florin pa luna. E nivel di bijstand, pensioen di SVB y salario minimo tur ta bou e bestaansminimum den forma grandi.

Cu trendnan inflaccionario y un posibel recesion economico global, Aruba atrobe lo sufri den manera sumamente directo. Esaki lo crea deficitnan mas grandi ainda bou e circa 50.000 habitantenan cu ya caba ta bou e bestaansminimum aki.

Riba termina largo esaki ta crea tur sorto di trend social y politico hopi desfaborabel pa ambos Aruba y Hulanda. Riba termino corto nos lo wak mas pobresa visibel, mas criminalidad, mas malesa mental y adiccion na substancia. 

E trend riba termino largo ta mas espantoso ainda, unda desesperacion bou pueblo lo crea un fundeshi perfecto pa partidonan “radical” y politiconan populista tuma luga den funcion politico di isla Aruba.  Esaki por tin consecuencianan profundo unda relacionnan dentro di Reino por deteriora, cual no lo cumbini ni Aruba of Hulanda den niun manera.

Tambe e ta pone Hulanda den spotlight di nivel politico internacional den manera sumamente malo. Esta di un creditor sin misericordia pa su mesun partner di Reino.

Debi na tur factor cual ta riba termino corto y largo, e tragedia local di pobresa visibel na Aruba, e trendnan macro-economico internacional y e riesgo grandi di destabilisacion social y politico ta haci e apelacion urgente aki na gobierno di Hulanda.

Debe impagabel

Segun e rapport mas recien di International Monetary Fund (IMF), Aruba na e momento aki tin un Debt-to-GDP ratio di +/-120%.

Fuente: IMF Rapport 2021

E nivel aki di debe simplemente no por wordo paga den manera real corigi pa inflacion. Tin tanto ehempel historico y gewoon rekenen di scol basico cu ta indica cu debe riba 100% di GDP no por pag’e den termino real. Pa forsa un pais cu pa colmo ta supuestamente un partner igual den Reino pa toch purba paga esaki bek, ta un forma di maltrato financiero cruel.

Aruba merece di ricibi un trato como parti berdadero di Reino.

Aruba, door cu e ta situa pafo di e continente fisico Europeo, lastimamente ta perde tur derecho di steun oficial di Union Europeo y IMF durante e crisis di pandemia di Coronavirus. Aruba como isla turistico a sufri di un manera sin igual di esaki.

Hulanda como pais a haya biyones den steun di Union Europeo. Enfasis ta riba e hecho cu esaki ta placa cu no mester paga bek. Hulanda como un di e paisnan mas rico na mundo ta haya acceso na herment asina.

Pero na mesun tempo a FIA pais Aruba placa, cual simplemente e no por paga bek. Mientras cu supuestamente nos ta un parti stima di Reino.

Trend di inflacion y recesion economico global pa crea mas sla pa Aruba

Den ambos trend di inflacion y crecemento economico tin temponan hopi dificil na caminda globalmente segun e ultimo rapportnan di Bank of America y Merril Lynch.

E trend internaccional di inflaccion a wordo cubri den manera extensivo den mi persona su articulo di mas recien. (https://24ora.com/crisis-di-costa-di-bida-lo-bira-pio-den-e-ananan-cu-ta-bin/)

Pa haci esaki pio nos ta wak cu crecemento economico globalmente ta bay cay den manera espantoso segun un analisis di BofA ML.

Fuente: Bank of America Merril Lynch

Ya Caba tin Pobresa: Bestaansminimum y su deficit

Fuente: Central Bureau Statistiek Aruba

Ya caba e bestaansminimum pa un adulto sobrevivi na Aruba ta mas cu 2.500 florin. Si wak esunnan riba bijstand, pensioen di SVB y salario minimo, nos ta wak cu tin casi 50.000 hende na Aruba cu ta biba bou e minimo aki.

Esaki ta un tragedia humano di e nivel di mas halto y cu Hulanda ta ampliando esaki ta algo cu mi persona no por compronde.

Instabilidad Politico

E tragedia humanitario di pobresa no ta bay ta sin consecuencianan hopi severo riba nivel local of den Reino. Si e deficit economico di esunnan mas pober sigui crece, lo sin duda bin espacio pa visionnan politico mas extremo. Esaki ta algo cu historia a mustra nos tanto na tanto biaha, no pa menciona paisnan Europeo mes manera Alemania, cu a cay victima na trendnan extremo politico despues di e hyperinflacion di Weimar.

Si e trend macro-economico y e pagamento di debe cu no por wordo paga cristalisa su mes, cu tempo nos lo wak cu e figuranan manera Chavez, lo surgi den e panorama politico di Aruba. Cual ta algo cu ni politico of poblacion di Aruba of Hulanda lo ta warda riba dje.

P’esey, tanto e politico local y esun internacional mester bin hunto pa haya un solucion na e debe impagabel di Aruba prome cu nos dushi isla deteriora riba un nivel cu lo causa instabilidad social y politico.