Simon Waslander: Crisis di costo di bida lo bira pio den e añanan cu ta bin

Lastimamente un trend fuerte riba nivel internacional financiero ta esun inflacion halto. Den un manera sumamente directo esaki ta causando un crisis di costo di bida y desigualdad economico. Los di color of preferencia politico, cua gobierno cu ta den poder mester tuma pasonan pa minimalisa e daño di esaki. Si e pasonan aki no wordo tuma tin riesgonan grandi di instabilidad social y politico. Esaki no ta siguramente un exageracion si nos wak paisnan grandi y basta rico manera Francia cay den protestanan violento.

E rapporte breve aki ta pa splica kico ta pasando riba nivel macro-economico internacional pa asina cua partido(nan) cu ta den poder por tuma pasonan pa yuda e populacion local, prome cu ta laat.

Inflacion ta un Crisis Mundial

E crisis di costo halto di bida, no ta uno exclusivamente pa Aruba. Aunke nos lo pensa cu te hasta e atencion di Gobierno y Parlamento pa cu esaki kiermen cu esaki ta un problema local so.

Esaki sigur no ta e caso. Letterlijk tur region grandi economico incluso, Europa, Estados Unidos, Australia, Hapon, Canada y Inglatera, tin inflacion na nivelnan sumamente halto.

Interes di Banco Central pa Baha

Awo banconan central full rond mundo bou di precision inmenso di publico y gobiernonan a hisa interes den manera drastico.

E unico problema ta cu e mercadonan global no por wanta e interes na e nivel necesario pa baha inflacion. Ya caba nos ta wak problemanan hopi severo den e sector di banco y real estate comercial na ambos Merca y Europa.

Dor di esaki, mercadonan no ta solamente pensa cu interes ta bay cuminsa baha, pero cu e lo baha den e manera mas rapido den historia financiero!!

Dus un bes mas e interes ta bay keda bou nivel di inflacion. Dus no solamente cu e problema di inflacion y costo di bida lo keda mesun malo, pero e lo bira sumamente pio den e siguiente añanan, debi na trendnan internacional di banconan central.

$5.3 Trillion Dollar pa “Busca un Hogar Nobo”

Un factor sumamente espantoso si nos papia di crisis di inflacion of costo di bida, ta cu ya caba tin mas cu $5.3 Trillion Dollar US, den likides. Esaki ta un suma gigantesco. Esaki no ta placa cu lo traha, pero placa cu t’ey caba.

Awo e suma inmenso aki, lo cu tempo “busca un hogar nobo”. Cual lo hisa prijs di tur cos “across-the-board”.

Debe y Deficitnan

E problema ta cu nos a drenta e fase final globalmente, di decada riba decada di abuso y mal maneho financiero cu full rond mundo nos crea e fundeshi di e problema di inflacion cu ta debi na simplemente mucho debe. E siguiente grafico ta di debe di Estados Unidos, pero relativamente Europa y Hapon ta den mi opinion hopi mas leu y severo cu Merca.

Hapon ta mustra e fase final

Cu un debe nacional na 240%, Hapon ta e pais cu mas debe den hisoria financiero mundial. Tambe eta mustra nos e fase final cu banconan central lo ta forsa di tuma.

Cual ta wordo yama “Yield Curve Control”. Esaki ta cu e banco central simplemente no lo laga interes riba mercado subi mas halto cu un punta cu nan ta determina. Esaki kiermen cu interes real, dus e interes despues di inflacion lo keda negativo.

Den e caso di Hapon nos ta wak cu interes real ya caba ta na -3.5%!

Ora cu esaki cuminsa bira u fenomeno global, inflacion lo hisa manera un racket den mi punto di bista.

Diferencia entre Rico cu Pober pa Sigui Crece.

Mas cu 5 aña pasa caba, e corant “Guardian” a indica cu nos ta den un esfera economico di “Gilded Age”. Esaki ta e number academico di un periodo unda rikesa ta hopi, hopi concentra.

Esaki tambe tawata e caso entre 1870-1929, unda un par di famia industrial y bancario na ambos Merca y Europa basicamente tawata tin tur forma di rikesa, wel no tawata tin clase mediano y unda 90% di e poblacion tawata hopi pober. Danki na innovacion y tecnologia, kico nos ta compronde bou “pobresa” a cambia hopi. Pero den m bista lastimamente e diferencia entre rico y pober lo bira mas pio den e siguiente añanan.

Esaki lo cuminsa causa tur sorto di trend socio-economico y politico cu ta hopi negativo.

Tin varios solucion

Awo cu nos a papia di e problemanan, den e siguiente serie di articulonan nos lo papia den detaye di tur e solucionnan cu ta posibel. Incluso tecnologia y accionnan cu nos gobernantenan por tuma pa minimalisa e impactonan di e trend internacional aki cu ta sumamente negativo.