Siman di Cuidado di Preso: “Integridad na prome luga!”

Desde dialuna 3 di october, Korrectie Instituut Aruba su trahadonan a celebra e ‘Siman di Cuidado di Preso’. E celebracion a consisti di varios actividad. Diabierna mainta nan a celebr’e cu un Santo Sacrificio di Misa na misa di Playa. Gino Winklaar, director di K.I.A., a comenta cu awe a celebra e ‘Bewaarders week’. Na aña 1992 a decreta e di dos diasabra den luna di october como e ‘Dia di Trahado di Prizon’, sinembargo e Dia di Trahado di Prizon a crece pa un ‘long weekend’ y awo e long weekend aki a bira un siman. Mañan, diasabra 8 di october,  ta e dia oficial di e trahadonan di prizon.

Durante su speech, Gino Winklaar, a toca e tema di integridad. El a sigui comenta cu, nos ta den tempo di post-pandemia y ta mira cu tin hopi conflicto internacional y tension entre e paisnan grandi ta pone extra presion financiero. En realidad, segun Winklaar, nos ta den recuperacion pero e presion internacional ta pone presion extra. 

Como director di K.I.A. e ta preocupa  y e ta sigur cu demas directornan di e demas departamentonan di husticia tambe, mirando con e impacto economico lo afecta e integridad di e trahadonan. E trabou di prizon, polis, Inmigracion y Guarda Nos Costa….tur ta trabou cu ta exigi hopi integridad y ora cu e budget di e trahadonan no ta yega fin di luna e tentacion pa no cumpli cu integridad lo bira un ‘issue’. 

Un parti di Winklaar su speech cu a hala atencion tabata na momento cu el a dirigi su mes na su coleganan bisando: “The truth doesn’t cost you anything but a lie could cost you everything”, e mensahe tras di esaki ta cu e mentiranan por costa bo tur cos. Si cuminsa na bisa e berdad no lo tin nodi bisa mas mentira. 

Kim Maduro, Presidente di Comision di Trahadonan di Prizon y alabes cuidado di preso, a splica cu a ricibi bishita di Boneiro, Corsou, Sint Maarten y Suriname pa e celebracion. Durante e siman tabatin varios actividad deportivo manera tiramento, volleybal. Tambe tabatin wega di Mens Erger Je Niet. Maduro su mensahe pa su coleganan ta pa “Stima bo trabou y hacie cu dignidad y amor.” Maduro a continua bisando cu si no haci esaki no lo ta posibeL pa yega e añanan di dienst. Ta importante pa corda cu dignidad semper mester keda na prome luga!

Pa un relato mas amplio, lesa TREMPAN.