Siman di Celebracion di Lantamento di Mucha

E Comision Vision Pedagogico conhuntamente cu algun mayor hoben a anuncia e “Siman di Lantamento di Mucha”. Pa di 5 aña ta organisa e siman aki cu tin como meta pa pone enfasis riba derechonan di mucha y e 6 puntonan basico di con pa lanta un mucha. E aña aki esaki lo tuma luga cuminsando diadomingo 13 di november te cu diadomingo 20 di november 2022.

Na 2016 Aruba a forma un comision Vision Pedagogico cu e meta pa formula y promove e Vision Pedagogico di Aruba. E comision aki ta consisti di 5 diferente organisacion: Fundacion Pa Nos Muchanan, Stichting Wit Gele Kruis Aruba, Fundacion Respeta Mi, Tienda di Educacion y Centro pa Hoben y Famia. E organisacionnan aki conhuntamente cu Fundacion ADRA y FADA ta forma parti di e Centro pa Hoben y Famia unda nan ta ofreciendo diferente servicionan ariba tereno di lantamento di mucha na e famianan di Aruba bou di un solo dak. 

esde 2018 Aruba a introduci e Siman di Lantamento di Mucha. Alabes a scoge pa den e siman aki inclui e fecha di 20 di november cu ta “Dia Internacional di Derecho di Mucha”. Aruba ta uni su mes na e causa aki y ta enfatisa e importancia di e 6 puntonan basico: pa lanta nos muchanan den un ambiente di siguridad y amor, pa mayornan duna nan yiunan apoyo positivo y corda pasa tempo hunto, pa nan tin expectativanan realistico y tambe brinda un disciplina positivo. Cu e mayornan sa e importancia di cuida nan mesun salud mental y sa unda pa busca ayudo.

Cada organisacion di e comision a scoge pa organisa un actividad grandi e siman aki cu e meta pa promove un di e 6 puntonan basico. 

Alabes varios otro organisacion manera a scoge pa promove e derechonan di mucha, paso ta mira e importancia pa nos muchanan y nan famia ta na altura di derechonan di mucha y e 6 puntonan basico pa asina tur mayor por lanta nan yiu den un hogar cu amor, cariño y respet y paso e bienestar di nos muchanan ta e responsabilidad di nos tur. 

Nos kier manda un invitacion pa henter comunidad pasa bishita e diferente actividadnan ariba e calendario, tanto pa mayor como pa mucha. Mayoria actividad ta gratis. Bin siña, disfruta y celebra!