Si no ta evento di carnaval…lo tin otro concierto e aña ‘ki

Diahuebs merdia, Darren van Ommeren, presidente di SMAC tabata invita den programa di Enfoke pa elabora tocante e anuncio haci e siman aki, cu Caiso & Soca Monarch lo tin su anochinan di pre final den luna di november. E noticia a genera hopi reaccion contradictorio den comunidad y te hasta Minister di Cultura a cay aden pa bisa cu no lo tin actividad di Carnaval durante temporada di fin di aña.

Van Ommeren a cuminsa na splica cu SMAC ta encarga pa organisa tur actividad rond di Carnaval, mientras cu MUSICA ta organisa e Caiso & Soca Monarch percurando pa tur logistica, promocion, etc. SMAC ta e vergunninghouder.

MUSICA ta sinta cu nan partners, manera musico y asina ta bin cu un proposicion di fecha. Asina cu nan tin e fecha, ta acerca SMAC pa acomoda nan den e kalender di carnaval.

E cambio di anochi di pre-final ta cu a pidi pa move for di luna di januari/februari pa adelanta esaki na november, ta forma parti di un concepto nobo, segun van Ommeren.

Sinembargo, e miho persona pa duna splicacion di e con e concepto a cambia lo ta presidente di MUSICA, Edwina Werleman. En todo caso, e fechanan cu SMAC a aproba ta tres anochi di pre-final cuminsando dia 12 di november cu ta e dia despues di inicio oficial di temporada di Carnaval, conoci como 11-11. E otro dos prefinal lo ta dia 19 y 26 di november. E anochi final mes si ta keda tuma luga den januari 2023.

Loke si van Ommeren por a comparti ta cu parti di e obhetivo tras di e cambio aki ta pa brinda e musico mas tempo pa e temanan penetra den publico y coy plaza. Den pasado e anochi di pre-final y final tabata tuma luga den transcurso di e mesun siman y casi no por a scucha e temanan bon na radio, prome cu ya e clasificacion ta tuma luga.

SMAC normalmente ta haya un permiso general for di Cuerpo Policial Aruba pa realisa tur actividad di Carnaval. Den e caso di e proximo temporada, no a haya e permiso ainda, cu a pidi pa e core entre 11 di november 2022 te cu 22 di februari 2023.

Sinembargo, den transcurso di diahuebs, Minister di Cultura, mr. Xiomara Maduro, a duna di conoce cu no ta bay tin actividad di carnaval den november. “Fin di aña nos tin nos tradicion. Ora aña bolter tin periodo di Carnaval.”

Darren van Ommeren a duna di conoce cu MUSICA ta negociando cu Minister di Cultura riba su ponencia. “Realidad ta cu si no tin anochi di pre final, lo tin un fiesta of otro actividad,” asina e presidente di SMAC a indica.

Pa e relato completo, lesa TREMPAN