Shailiny Tromp-Lee na Mike Eman: AVP a crea pobresa y necesidad p’e pueblo

Durante reunion publico, dialuna 24 di april 2023, partido AVP a bisa cu desde augustus 2022 nan a pidi pa un reunion pa trata dos aspecto importante esta costo di bida y poder di compra, y cu mester a warda te e dia ey pa esaki. Realidad ta cu nan tabatin monton di oportunidad pa atende cu e aspectonan di preocupacion aki.

Ta bon pa nos corda AVP y pueblo cu oposicion completo deliberadamente a scoge pa no participa na tratamento di presupuesto 2023 cu a tuma luga na november 2022. Sigur esaki tabata e momento ideal pa nan a eherce nan trabou di control y hunga un rol riba e direccion den cual nos isla ta keda maneha. E reunionnan aki tabata e momento ideal pa nan a aporta na maneho y desaroyo di nos pais y nan a scoge pa no haci esaki. Nan a scoge pa no representa nan votadonan debidamente, pa para pa esunnan cu segun nan awe nan kier para pa nan. Nan a scoge pa no pone Aruba na prome luga.

Ora cu mi a spera cu AVP ta bin cu nan preocupacion y presenta posibel solucion, durante prome tanda fraccion berde cu a pidi pa e reunion aki, no a presenta nada nobo. Ta manera cu leu a leu nan ta haya nocion di e realidad y ta bin realisa cu nos pais y nos hendenan ta yena di reto. Nan ta keda sinti e necesidad di keda accentua e situacion di pobresa y necesidad di algun famia den nos sociedad manera cu ta awor e situacion a bira asina. Sin acepta cu e realidad aki ta conta di desde cu nan ta den gobernacion.

Pasobra e realidad cu nan kier proyecta ta un realidad cu MEP a bin ta accentua y sigur Gabinete Wever-Croes 1 y 2 a bin ta atende. Nos no por lubida cu gran parti di e realidad aki ta AVP a ocasiona, nos no por lubida e crisis social cu nan a bay laga atras y cu lo tuma tempo pa atende cu ne, nos no por lubida e megadebe cu nan a crea den tempo di bonansa y cu awor pueblo mester cuminsa paga bek. Un realidad cu, aunke AVP no kier mira y bisa, a keda empeora door di e pandemia y e guera na Europa. No ta cumbini nan tampoco pasobra unico retorica cu nan tin ta di ataca y critica, brindando cero solucion. Door di reconoce e impacto devastador di Covid riba Aruba y mundo henter ta stroba nan trabou di instiga, dividi y crea caos.

Pueblo por a tuma nota con accento a keda poni dialuna mainta riba bestaansminimum y salario minimo y e diferencia entre esakinan pa accentua e grado di pobresa cu ta existi riba nos isla. Nan tin hopi curashi mirando cu durante e ultimo ocho aña di gobernacion nan a ocasiona un desaster social y financiero cu a conduci cu nos no tabatin espacio financiero pa por a atende cu e pandemia y cu e pandemia a impacta e situacion financiero y social mas ainda.

Durante reunion Mike Eman a bisa cu nos lo kier purba di mat’e como e mensahero, e mensahero di mal noticia. Un mensahero cu a perde tur toke cu realidad. Durante prome tanda mi a subraya e echo cu ta hopi dificil pa nos por haci esaki, pasobra pa hopi tempo e ta den coma caba, practicamente morto. Leu a leu e ta lanta door di soño solamente pa drenta den e retorica di elogio propio y accentuando su falta di toke cu realidad, aportando na ningun manera na desaroyo di su pais. Pa dos aña caba e no ta presenta na trabou, no ta participa na ningun reunion di comision, no ta fungi como lider di su fraccion. Ta con e por representa su pueblo?