Shailiny Tromp-Lee (MEP): Ta aplaudi reconocemento di baluarte ora nan ta bida

Diamars anochi, riba Dia di Santa Cecilia patrona di nos musiconan, Gobierno a organisa un bunita actividad di reconocemento. Durante e anochi special aki, Minister di Cultura Xiomara Maduro a reconoce seis baluarte riba tereno musical. Seis cabayero cu a aporta grandemente na nos herencia musical y ainda ta deleita nos cu nan talento y creatividad.  Ta trata di señores Victor Camacho, Casin Giel, Chicho Kock, Chucho Hoek, Ivan Cuandus y Cesar Olarte. 

Mi ta di acuerdo cu Minister Maduro caminda den su speech e anochi aki a indica cu nos pais pa con chikito cu nos ta, ta grandi na talento. Mi ta haya na su luga y ta di acuerdo pa nos reconoce nos musiconan ora nan ta na bida, duna elogio y atencion na tur nan logro. Pa mi nos mester accentua cu mediante nan creatividad nos por fiha loke nos ta pensa, sinti, experiencia y mucho mas. Cu nan creacion nos por crea, rebiba y recorda momento special. A base di nan produccionnan ami sigur por haci loke mi gusta haci mas, cual ta baila. 

Hunto cu nan famia y sernan keri e musiconan a keda poni den spotlight y a ricibi nan reconocemento. Gobierno sigur a gradici e casa y e famianan p’e sosten brinda na nos musiconan durante henter nan trayectorio. Durante e anochi nos por a disfruta di un video cortico di e logro y aporte di cada baluarte na desaroyo musical di nos pais y sigur na nan logronan internacionalmemte. Sigur por bisa cu e carera di cada un di nan, riba nan mes ta impactante. 

Un felicitacion na cada un di nan, y nan famia, sigur ta na su lugar. Alabes mi kier dirigi palabra di gradicimento na Minister Maduro pa a y sigui reconoce nos baluartenan riba diferente tereno. Aruba ta orguyoso di boso.