Durante un conferencia di prensa, parlamentario di MEP, Setty Christiaans-Yarzagaray a trata e topico di pobresa, un tema cu a bin dilanti tambe durante e reunionnan di IPKO.
El a indica cu na Aruba no tin un asina yama ‘armoede grens’ pasobra ainda ta en espera di e income and expenditure survey pa por determina esaki. Por bisa cu pobresa a bira manera un cabay di campaña na Aruba, cu tur cos ta pobresa. Durante e reunionnan di IPKO, e parlamentarionan a haya un presentacion di e Sociaal Cultureel Plan Bureau, e mesun instituto cu Mike Eman ta papia di dje cu ta haci estudio. Den e caso aki e miembronan di Eerste y Tweede Kamer a zorg pa e instituto duna e parlamentarionan un presentacion di con e aanpak tabata na Hulanda, cual nan tambe a tuma un aanpak multidimensional. Hopi biaha ta djis coy entrada di un persona, ta wak e inkomensverdeling. Ta waak e bestaansminimum na Aruba y tur hende cu ta cay bou di esaki, ta cay den un grupo di pobresa ( armoedegroep).
Ainda niun gobierno a determina kico ta e liña di pobresa, pero si mester determina esaki. Esaki ta loke e Sociaal Cultureel Plan Bureau di Hulanda si tin. Nan ta hasta duna indicacion di cual ta e averahe minimo cu ta entrada cu ta cay bou di e nivel. Ta importante pa determina esaki pa nos pais, pa por ahusta e cantidad di hende cu ta pidi ayudo na Departamento di Asuntonan Social, pa determina ki ta e ayudo cu e hendenan ta haya. Sea ta door di un bijstand of otro ayudo social brinda door di Departamento di Asuntonan Social.
Ta duna ehempel di con un persona cu tin dos trabou por ta pober, no na placa, pero na tempo cual ta haci cu e persona no por sigui desaroya su mes pa haya un miho trabou y tampoco tin tempo pa su famia. E parti social no t’ey y tampoco tin tempo pa por dedica na educacion pa sigui supera nan mes. Pues ta boga pa tur pais den Reino yega na un liña unda cu ta midi pobresa mescos pa asina por haci comparacionnan real cu otro.
Comment