Setty Christiaans-Yarzagaray (MEP): Aumento di BBO ta consecuencia di e mal maneho financiero di AVP

Setty Christiaans-Yarzagaray a hiba palabra dialuna mainta den conferencia di prensa semanal di Movimiento Electoral di Pueblo (MEP) caminda el a elabora riba e cambionan di ley cu diamars Comision Fiho di Finanza di Parlamento lo trata y puntra riba dje na caminda pa su aprobacion como parti di e Plan di Impuesto 2023. E parlamentario di coalicion a indica cu oposicion no sa di nan pasobra no a traha dia cu a papia di esaki.

Christiaans-Yarzagaray a indica cu diamars cu a pasa Parlamento di Aruba a ricibi e ley di Landsverordening Bedrijfsomzetten pero tambe adicional e voorziening PPS projecten, Landsverordening Bestemmingsheffen; tur e cambionan di ley necesario pa cumpli cu e Plan Fiscal 2023. 

“Pa esunnan cu no sa, parti di esaki a wordo papia caba den presupuesto, el a wordo menciona y durante tratamento di presupuesto eskai a bin dilanti. Manan ta deadline pa haci pregunta riba loke ta e ley di banda di parlamento, den e proceso normal cu un ley ta cana,” asina Christiaans-Yarzagaray a indica.

Di momento cu e cambio a bira conoci cu ta bira 1% extra di BBO en bes di e introduccion di BTW, a acerca e minister y a bisa cu lo bin duna parlamento e presentacion pa asina Departamento di Impuesto mes por splica kico precies ta cambia y e motibonan pakico.
Christiaans-Yarzagaray: “Esunnan cu ta critica awe cu ta awo nan a haya sa, ta pasobra no ta bin trabou. Shete dia largo a trata preusupuesto, parti financiero a sosode sigur riba di 5, 6 y di 7 dia unda a ricibi pregunta riba esaki y a duna un poco informacion mas y logicamente no den contenido di ley ainda, pero si mas of menos kico por spera.”

E parlamentario a bisa acerca cu e cambio di belasting aki, cu ta segun e belastingplan 2023, no ta pasonan di awo pero cu a bin ta tuma luga desde Gabinete Wever-Croes I. Nan ta consecuencia di e proyectonan PPP y e debe laga atras pa realisa e proyectonan aki cu, segun Christiaans-Yarzagaray, awe berdad ta util, pero e tin un prijs.

“Nos ta core riba Watty Vos Boulevard y Green Corridor. tin un renobacion grandi cu, te cu dia di awe no por caba di hospital y a yega momento cu, manera e ex prome minister Eman a bisa, cu orguyo mester paga bek,” asina e parlamentario a bisa puntrando cu Eman ta bay splica pueblo cu e momento ey a yega.