SEPPA: Gobierno a aumenta tarifa di awa y coriente sin dialoga

E tema di combersacion e ultimo dianan sin duda ta e aumento di prijs di awa y coriente, cu atrobe na ultimo momento, cu weekend den porta, trahado ta haya e ‘gran noticia’ cu pa entrante e mesun dialuna siguiente prijs di awa y coriente ta subi. E critica ta tambe riba e ‘bracket’ nan y ta mustra cu ta e trahado, e famia humilde so a haya e golpi. Cu e aumento aki ta nifica tambe cu prijs di tur cos den tur tienda atrobe ta bai subi. 

Esaki a causa hopi preocupacion den hopi hogar. Sigur e trahado cu tur dia mester sali pa su trabao pa gana su pan di cada di dia y di su famia. Apenas un par di tempo atras, ya e noticia a core rond pa despues wordo anula. Cu actonan asina, di tuma desicion di un dia pa otro, cu despues ta wordo hala un banda ta crea speransa falso cerca e trahado y nos pueblo, cu di un noticia

‘sumamente malo’, cu esaki lo no bin bek y si bin bek mes e no ta asina ‘doloroso’ manera cu awo si a keda presenta. 

Claramente loke ta haci ta ‘gaña’ pospone un ‘golpi’ y laga comunidad kere cu el a haya un suspiro pa despues e golpi mes bin y ta kita e rosea finalmente. Ya caba e trahado y henter nos comunidad ta enfrentando prijsnan halto di producto, di cuminda, di servicio y hasta preparando pa tur loke e posibel introduccion di e famoso BTW lo trece pa nos na comienso di 2023. Pues, e trahado no ta den e miho perspectiva, ta desespera cu awo caba loke e tin den su cartera of loke ta hiba su cas no ta yega.

Trahado no por sostene tipo di aumento asina! Inflacion di e ultimo añanan a baha e balor di ‘salario’ drasticamente caba. Ta bon pa tur hende realisa cu e aumento aki di awa y coriente ta bay nifica cu ningun prijs di producto lo no baha mas y esaki lo bira tambe e prijs nobo cu e hende mester bay custumbra of biba cune.

Pueblo a vota pa un gobierno maneha y dirigi e isla aki unda ta pone e hende central. Tipo di aumento asina ta refleha diferente. Pues, loke Gobierno mester a haci y ainda por haci ta yama tur partido den dialogo, sinta na mesa y ban hunto ‘mitiga’ e peso cu den tur forma ta cayendo solamente riba nos pueblo. Ta pakico ta e trahado, nos pueblo mester carga tur peso, tur dolor y otronan manera nos comerciantenan y te hasta gobierno no por haci ‘menos ganashi’? Ta parce cu consideracion pa cu nos comunidad y e ser humano ya no ta existi!

Eyfo ta manera ‘cayman’ nan ta pa subi prijs y spera nos comunidad cu e tiki cu e lo por tin, bin cumpra toch. E hende mester biba y ta hay’e ta cumpra sino ta con e ta biba? Nos ta scucha tambe cu negoshinan ta grita cu nan lo bay cera pero di otro banda e trahado of e pueblo si e no tin forma pa cumpra ta con e ora? Esaki ta un brug cu nos tur ta riba dje y sea nos ta crusa hunto, ta parti e peso di e ‘golpi’ di e normal nobo aki y kisas ainda tiki tiki nos ta sobrebibi. Pero si un banda kier pa nan so, ta cuestion di tempo pa nan tambe realisa cu pronto nan lo no tey.