SEPPA: Accion na Arubus ta continua

Ki dia of ki ora e siman aki lo paralisa (parcialmente) transporte di bus cu Arubus, ainda no ta mucho sigur. Tin tur indicacion cu lo ta diahuebs awo. Awe marduga desde 4:00 am e empleadonan a bay den accion y pa 8:00 am nan a reanuda trabou bek.

No tabatin reaccion di gerencia na sindicato ainda riba e manifestacion. Pesey, di banda di trahadonan mas bien ta papia idioma di intensiva e accionnan mas ainda. Tur esaki ta sinta na negosacion andando pa mara e compania na un areglo di trabou nobo pa e trahadonan. Gerencia kier haci algun adaptacion pero ta parce cu for di e otro banda di mesa no tin mucho apetit. Ta menciona cu e compania no tin fondo pa sigui aumenta salario y a menciona cu algun di nan ta gana mas cu e director mes.

Na dado momento a envolvi Mediador di Gobierno den e negosacion pa mira si por coordina e areglo miho, pero esey tampoco parce di ta dunando resultado.

Echo ta cu Minister Ursell Arends a percura pa un Hunta di Comisario nobo den e compania, cu algun figura bon capacita pa guia e compania den un miho direccion. Abogado mr. Demis Illes ta na cabes como presidente. Pero, pa sindicato, esey mes ta un problema caba pasobra e ta mucho cerca of ta bon amigo di e director, cu kende tin e disputa awo. Pues, sindicato ta mira e Hunta di Comisario como un “verlengstuk” di gerencia y no como un instituto independiente pa controla y supervisa maneho di e director.

Corte algun tempo atras a dicta un sentencia pa impone regla na momento di accion, welga of manifestacion di sindicato na Arubus. No a kita e derecho di manifesta of protesta, pero si a impone un condicion cu mester avisa 72 ora (tres dia) prome. Pa asina gerencia por coordina e transporte publico pa no perhudica e clientenan, mayoria trahado den e sector HORECA, much’i scol y turista. Hisa benta yama accion di anochi pa mainta no por mas y e compania por cobra sindicato daño y perhuicio den un caso asina. Pesey for di tres dia prome tambe a avisa cu lo tin accion awe dialuna. Gerencia a trece algun chauffeur di afo pa stuur y toch cumpli parcialmente cu e clientenan. Trahadonan den accion para pafo a sigura cu mayoria di e chauffeurnan cu a stuur awe pa Arubus no tin un rijvergunning valido mas!

Minister Ursell Arends ainda no a vocifera su opinion riba e manifestacion di awe mainta.