Despues di a finalisá limpiesa di barionan den área di Zegu te ku Banda Bou resientemente Selikor a start ku limpiesa den barionan di e área di Sta. Rosa te ku Fuik. E trabounan lo dura te mas o ménos luna di yanüari 2023.
Pa aña 2022 gobièrnu a pone presupuesto disponibel pa hasi limpiesa di kareteranan prinsipal i tambe barionan. Manera ta usual Selikor a plania i organisá pa e trabounan di limpiesa por a tuma lugá. Pa mayoria di e trabounan di limpiesa Selikor ta hasi uso di kontratista òf fundashonnan di bario. Den sentro di suidat i áreanan rondó di esaki tin algun ku Selikor su personal mes ta mantené limpi. Pa loke ta trata limpiesa di kareteranan prinsipal esaki ta trabounan ku ta tuma lugá durante henter aña i pa loke ta trata limpiesa den barionan esaki ta tuma lugá un bes pa aña.
Limpiesa di kareteranan prinsipal ta sosodé ku 24 organisashon di kua 7 kontratista i 17 fundashon di bario. E organisashonnan akí ta risibí kada bes un kontrakt di 2 luna. Ta stipulá e montante a base di grandura di e área. Ta mustra e organisashon e trabou i despues di pidi e pèrmitnan nesesario pa traha riba vianan públiko na instansianan gubernamental e organisashon por start ku e limpiesa. Durante e trabou funshonarionan di Selikor ta pasa hasi e kòntròlnan nesesario. Despues ku e organisashon entregá e trabou Selikor ta evaluá e resultado i si esaki ta positivo ta preperá tur dokumento pa e pago tuma lugá i pa un kontrakt nobo wòrdu firmá.
Pa limpiesa di bario ta traha ku 210 organisashon/fundashon di bario. Un kantidat di 143 organisashon ta risibí un kontrakt a base di un evaluashon positivo di e aña anterior i tambe fundashonnan ku ta operá den e barionan en kuestion. A skohe e sobrá 67 for di e portafolio den kua tin un total di 260 aplikashon ku Selikor a risibí di tur interesado ku ke bin na remarke pa trabou di limpiesa. E proseso di saka lòt ta sosodé dor di un komishon ku kada bes ta varia di miembro pa garantisá transparensia i ophetividat. Despues di e proseso di lòt e organisashonnan ta risibí nan kontrakt. Ta stipulá e montante a base di grandura di e área. Ta mustra e organisashon e trabou i despues di pidi e pèrmitnan nesesario pa traha riba vianan públiko na instansianan gubernamental e organisashon por start ku e limpiesa. Despues ku e organisashon entregá e trabou Selikor ta evaluá e resultado i hasi e pago akordá.
Selikor ta konta riba koperashon di outomobilistanan pa tene kuenta ku trahadónan ku ta laborando kantu di kaminda i baha velosidat den áreanan den kua e trabounan ta tumando lugá.
