Secretario General Maroushka Tromp: Cobertura di UNESCO ta amplio y no semper visibel

E areanan di trabou ta asina amplio, cu ta haci difícil pa menciona algo concreto. Asina e Secretario General di UNESCO Aruba a indica. Un ehempel cu por a duna sigur ta e scolnan riba nos isla cu recientemente a logra bira miembro di e ‘Associated Schools Network’ di UNESCO. Fuera di esey, proximo luna Aruba lo fungi como anfitrion di un reunion di e secretariadonan di e region Caribense riba e importancia di documentacion y balor di memoria intangibel.

E convencion di Anti Doping ta esun di mas existoso di UNESCO. Aki na Aruba tambe ta bezig cu Ministerio di Deporte y Comite Olimpico Nacional. Tambe, durante e conferencia duna diahuebs atardi na sede di e agencia den hala monumental di John F. Kennedy Jr. Center for Education, secretario general Maroushka Tromp a menciona un cooperacion Bureau Rampenbestrijding Aruba riba preparacion pa tsunami como un di e tantisimo area cu UNESCO ta cubri na cada pais cu nan ta presente.

Minister Xiomara Maduro y Secretario General Maroushka Tromp a anuncia cu e Comite Regional di UNESCO di e programa ‘Memory of the World’ – MOWLAC, a acerca Pais Aruba pa ta anfitrion di e 22 reunion anual cu, pa prome biaha ta wordo tene na Aruba, na luna di november awor.

Durante e encuentro cu media local a enfatisa riba e sentido di orguyo cu MOWLAC a scoge Aruba pa motibo cu nos ta e pionero riba tereno di digitalisacion y presentacion di sugerencia documental. Pa e mesun motibo aki Aruba a haya asiento den e Comite pa e proximo 4 aña. 

Pa e relato completo, lesa edicion di TREMPAN