Sandra Hijmering-Yee:  Stop di uza mi nomber pa politica di shisheria!

Manera ta conoci caba den comunidad dia 13 september 2022 a tuma luga e celebracion di apertura di aña parlamentario 2022- 2023. Manera a splica caba riba e dia aki, mi persona y algun otro persona mas a presenta parti pafo di parlamento, unda cu por a tuma nota di algun papel cu algun punto di mal contento pa cu e gobierno actual.

Papel cu a djis refleha locual tur dia pa 5 aña caba ta papia, critica den pueblo y sindicato den diferente area y sigur preocupacion cu ta encera ful Aruba y su futuro. E grupo aki no a expresa nada otro cu locual den diferente media, diferente lugar y diferente hogar ta wordo expresa door di diferente hende cu ta fada di e abusonan cu ta tumando luga. 

Nos presencia aparentemente lo a incomoda algun miembro di parlamento y gobierno cu maske mi a bay radio y splica ki tur a pasa y hasta a sali un relato pa nan lesa tambe, no a keda contento y keto bay ta keda busca e forma di rebaha e grupo pero specialmente mi persona y Mike Eman. 

E dia aki tabata un dia special pa celebra e aña di parlamento y asina aki huramenta un biaha mas riba e responsabilidad y tarea general pa cu parlamento. 

Como tal riba un dia asina special tabata bon pa mustra parlamento cu e tarea y motibo cu boso tabata di bay celebra tin nomber y fam. PUEBLO DI ARUBA. Esaki no ta importa si tabata tin 100 hende of 10 persona, cada persona un mes ta ilustra boso trabao cu ta esunnan boso ta representa. Como tal cu nos presencia kier a duna boso e mensahe cu boso no por renoba un aña mas di parlamento sin renoba boso pensamento nan pa cu futuro di cada ciudadano riba e pida baranca aki. E carta e dia ey no awordo entrega pa e motibonan cu ya kaba mi a menciona den un entrevista na radio y tambe riba un relato.  

Shailiny Tromp-Lee ta sali den media y menciona mi persona y bisa cu esaki tabata puro show, PERO NINGUN di nan e dia ey tabata asina humilde di acerca mi persona of e grupo pa wak e motibo di nos presencia, unda cu ta pueblo nan ta representa.  Shailiny Tromp-Lee a sali expresa cu mester responsabilisa un hende pa cu esaki, anto mi ta puntra su persona kende ta para responsabel pa e desaster cu nan a causa na edificio di Aruba esta parlamento na aña 2015 ora cu nan a bin kima auto, destrui auto di persona cu no ta tin nada di haber den e asunto aki, kibra benta di parlamento, tira cu arma di candela riba edificio y polisnan cuasando daño y lesion na varios polis na man di manifestante durante cu nan ta  eherciendo nan trabou di cuida pueblo y edificio di pueblo esta parlamento?? Tur esaki cu aprobacion di boso Partido MEP. Te dia di awe ningun hende a para responsabel of a wordo persigui.  Si bo persona riba un dia asina special  a sali y mustra e humildad di bin puntra, bo lo no mester a sali den media y purba di laga e grupo y mi persona mal mira.  

Asina mes despues mi persona a bay parlamento cu e carta den mi man y boso tur a wak mi drenta y ainda asina ningun hende a sali un rato y puntra of tuma e carta. Siguiente dia mi a bay parlamento unda Edgard Vrolijk mes a atende mi den su kantoor unda nos a papia over di nos presencia cu tono firme y directo pero den seno di respet di ambos banda.

Ora mi persona a kere cu e tema aki a wordo papia y cu parlamento lo bay pasa door di e puntonan di e carta entrega, ta resulta cu e minister di Enseñansa y Deporte Endy Croes ta sali den media expresando cosnan cu ta un mentira di mi persona. E ta prefera di expresa gañamento y barbaridad di mi persona en bes di uza su tempo pa busca solucionan pa cu nos mucha-, maestro- y nos scolnan. Endy Croes por a pidi DRH mi informacion asina lo a haya e informacion corecto. 

Mi ta asombra cu Endy Croes kier grita di tur banda pa make sure cu Aruba completo haya sa cu ami lo por a traha cu Mike Eman asina purba di opaca e preocupacion real di mayoria di nos aki na Aruba. Pero mirando cu mi bida ta asina interesante pa e meneer aki y no a skirbi un relato tocante e puntonan di e carta y e la lubida haci un miho onderzoek, mi mes lo informa Endy Croes. 

SI, meneer, mi a traha pa Mike Eman pero sigur no 8 aña, mi a traha e ultimo añanan di su ultimo gobernacion.  Mi nunca a cobra schaal 16, pero ohala  tabata berdad pasobra sigur lo mi por a paga tur mi debenan. Ta bon pa remarca si cu maske nunca a yega e schaal halto cu bo ta menciona, Mike Eman si a pone tur esnan cu a traha cu ne entrega tanto prociento di nan salario. Tin a duna mas tin menos % dependiendo di nan entrada. Hopi di nos te hasta a traha den weekend y den siman fuera di ora di trabao y sigur ami ta un di nan cu a sa di kita hilchi y bay riba field y nunca a cobra overtime.  

A cuminsa den cas mes y esaki meneer Eman a haci cos cu te dia di awe ningun di boso a haci pero ta keda haci gastonan innecesario y mes momento ta kita di trahado, manera ta e caso di 12.6% di e ambtenaar, kitando werkstersnan di scol y awor atrobe kitando overtime di polis. 

Mi ta RETA Endy Croes pa publica e documento oficial unda ta mustra cu mi a traha 8 aña cobrando schaal 16. Bo tin mi autorisacion pa busca tur esaki, mirando cu ta esaki ta mas importante cu mustra Aruba entre otro e contract di Eagle LNG.  Asina pueblo por wak en berdad con bo ta ganña y condena un grupo chikito vooral mi persona pa bo mes un condicion,  No ta e grupito aki ni mi persona ta esun a malversa y cay cera pa placa di lotto.   

Bo kier a rebaha mi dunando pueblo un imagen di mi robes bisando cuanto segun bo persona ami tabata cobra unda cu ey for mes tin hopi cu sa ken ta Sandra y con mi ta, cla pa yuda semper y sigur mi trabao cu Mike Eman mi a tum’e hopi na serio pasobra tabata trata di yuda y guia esnan cu menos recurso y unda tin amor pa yuda otro ey sigur ami lo kier ta, meneer Croes. 

Pa bo informacion tabata tin hopi di boso mesun hendenan trahando e tempo ey bandi Mike Eman, y awe ta den boso gobierno. Contrario na boso cu a kita 300 tata y mama di famia den pleno dianan di Pasco. 

Por ultimo, Endy Croes, ta bon pa bo bringa pa nos isla y pueblo engeneral pasobra si bo ta purba di haci caracter damage di mi persona esey NO ta bay kita boso mal maneho. No uza ami pa boso por bisa algo contra Mike Eman.  Boso politica di shisheria a refleha un biaha mas den e forma cu kier uza e grupo aki of mi persona pa por busca atrobe unda pa perhudica of persigui hende politicamente.  Nada no a pasa den parlamento ningun hende a exita otro pa violencia manera a haci na 2015. Crece mentalmente y discuti topico al caso pa cambionan real esey lo haci bo grandi un dia. Tur dia ami, abo y nos tur ta haya chens pa ta un miho persona cu ayera y dañando nomber di otro sin wak den bo mes mi n’ ta kere esey ta lo mas corecto. Aruba mester ta bon, pa bo, pa mi, pa nos tur. 

Semper mi a kere den Dios, den un ser unico cu tur dia ta cana cu mi y como tal lo mi sigui cana cara na halto cu mi Dios band’i mi. Pasobra no tin ainda un hende na mundo cu kier a haci bon y a wordo trata bon, historia a mustra con maldad ta purba di kibra e bon.