Sandra Hijmering-Yee: Ningun momento nos a insulta Gobernador

Dia di apertura di aña Parlamentario 2022/2023 nos a dicidi di presenta na dicho ceremonia pa manifesta e situacion preocupante, critico cu nos pais, nos pueblo ta bibando aden.

Pakico juist riba e dia aki? E ta un oportunidad pa asina nos por a entrega un manifesto na e Presidente di Parlamento cu e puntonan preocupante, critico, cu nos pueblo lo kier pa porfin parlamento trata den e Aña Parlamentario Nobo mas pronto cu ta posibel. Henter parlamento por a celebra e dia aki ta danki na sosten di e pueblo cu a pone nan ey pa representa nan. 

Ningun momento nos a insulta Gobernador, manera a insinua den cierto media pero a trece e realidad cu e mayoria di e pueblo mes ta keha di dje treciendo e berdad di e Gabinete Wever-Croes II. Nan a prefera di haci politica cu esaki, sin sali bin wak ta kico ta locual nos tabata kier a entrega. Durante e manifestacion aki nos a haci uzo di algun papel unda den silencio nos a expresa algun di e sentimento nan cu cada un di nos aki na Aruba ta bibando tur dia.  E intencion di esaki tabata y ta pa corda nos parlamentarionan y gobierno pa kende y pa kico nan ta den gobierno of den parlamento. 

No por bisa cu no tabata na altura paso mi persona a informa na parlamentario Alvin Molina y Miguel Mansur si nan lo por a informa e Presidente di Parlamento di nos intencion cual amablemente nan a bisa nos cu si. Mi a ricibi confirmacion cu Edgar Vrolijk tabata na altura. 

Cierto puntonan cu pueblo kier atencion p’e ta : 

• Transparencia den contract di Eagle LNG.
• Situacion alarmante di aumento di prijs di awa y coriente cu lo haci nos pueblo maspober 
• Pobresa  cu ta creciendo drasticamente tur dia.
• Mal uzo di fondo publico pa enrikese nan mes y famia.
• Mas nombracion  unda e pais su situacion financiero ta malo.
• Falta di perspectiva social y economico creando asina decadencia social den comunidad.
• Recorte den enseñansa y husticia.

Gabinete Wever-Croes II mester stop di hunga e politica estilo bieu purbando di uza nos manifestacion pasivo y nos intencion pa e por tira lodo riba Mike Eman of cualkier otro politico. Si Evelyne Wever-Croes tin un opinion di Mike Eman politicamente e mester afrenta esaki cu echo, cu trabao, cu dialogo den parlamento.  Pero NO uza nos manifestacion pa bo politica. E realidad ta cu NINGUN momento so e President di Parlamento tabata tin e decencia di sali aserca nos pa ricibi e manifesto. Tampoco ningun parlamentario a acerca nos, pero den nan mayoria si a pose pa camara pa entrevista, pero e mas importante cu ta duna atencion na peticion di esnan cu nan ta representa lastima esaki no a tuma luga. Mester duna danki si na Molina y Mansur pa almenos no a sigui cana bay pero para y scucha pa kico nos presencia e momento ey nan. Tambe un danki inmenso na Mike Eman cu durante su entrevista nos por a para hunto cu ne treciendo y compartiendo e mes un preocupacion pa cu nos isla y futuro di su hendenan. 

Parlamento a conoce pa prome biaha den historia cu  un grupo chikito den su mayoria hende muhe cu a presenta durante e celebracion aki.  Asina cordando parlamento cu nan celebracion ta un celebracion di traha pa pueblo como tal  esei tambe ta nan apertura di nan huiswerk pa cu e aña nobo aki di parlamento.  Ki miho oportunidad nan a haya pa a habri esaki den un forma respetoso tumando un carta cu puntonan conoci cu nan no a traha riba nan anteriormente y e aña aki nos ta urgi pa bini cu un reunion publico mas lihe cu ta posibel paso pueblo no ta wega di ningun politico. Boso tin un responsabilidad di atende e casonan cu ta perhudica nos tur den un forma  serio tratando e puntonan aki cu solucion y cu seriedad y no cu shisheria. Pero cu e acto- y contestanan concreto pa cu futuro di nos tur y cordando boso cu ey den ta tur color politico bo ta representa pasobra ta pa Aruba boso ta trahando y maske boso ta representa un color politico un ta pa e color ey boso ta trahando boso ta trahando pa Aruba y su hendenan p’esey boso ta ricibi un salario halto pa boso a tende cu e problemanan serio y cu responsabilidad pa nos isla. 

 Orguyosamente como hende muher por bisa cu nos grupo cual den su mayoria tabata hende muher di varios generacion, hunto a sa di yena cu curashi y para pa amor pa nos Isla. 

Ta clausura e tema aki pa awor aki bisando: “Edgard Vrolijk cu maske por ta bo no gusta nos, bo deber como President di Parlamento ta atende e casonan di pueblo paso bo no ta trahando den kantoor di cede di bo Partido. Parlamento ta consisti di tur color politico paso ta un parlamento so tin cu ta representa cada voto cu tin den parlamento su totalidad. NOS TAMBE TA PUEBLO!”