Sandra Hijmering-Yee: Gobierno no tin forma pa mustra desaroyo economico positivo

Gabinete Wever-Croes II pa adapta un presupuesto 2022 satisfactorio pa Hulanda pa evita un aanwijzing, mester a mustra e cifranan. Pero e gobierno aki no tin forma di demostra un desaroyo economico positivo pa pais Aruba, como tal nan mester a bin cu e medidanan pa por cumpli cu e normanan, si no, nan lo no por a duna un presupuesto adapta cu e cifranan cu ta ilustra entrada pa por mustra un reduccion den deficit, asina cumpliendo cu exigencianan di Hulanda.

Tur entrada di e gobierno aki ta mara na crucifica den tur skina e ciudadanonan di Aruba. Hulanda a ricibi un presupuesto adapta pero ainda pueblo no merece entre otro inzage riba e contract di Eagle LNG y tambe dicon a kwijtscheld Citgo tanto miyon y kende ta esunnan faborece den esaki?

Gabinete Wever-Croes II tur dia ta papia di mester paga debe etc., contrario na esaki no tin recorte den aparato gubernamental. Pero te awe ta keda aumenta e gasto- y gastonan di luho innecesario. Nan no ta haci e minimo esfuerso pa baha nan gastonan operacional. Nan ta papia di mas entrada pa Aruba, pero nan no ta realisa cu no por tin mas entrada di locual cu tin caba si no tin un economia cu ta draai cu inversion y e oportunidadnan laboral.

Un gobierno tin e responsabilidad di cumpli cu nos derechonan y nos cu nos debernan, como tal tambe ta nos deber di exigi un gobierno pa cumpli y respeta esakinan ora nan ta wordo trapa.

Esaki ta bisa nos cu si Hulanda no kier duna Aruba un aanwijzing, cual esey ta perfecto pa cara di nos Isla pero esey no kiermen cu nos aki na Aruba mester tuma un maneho di corupcion y abuso di parti di gobernantenan cu no tin niun sorto di compromiso colectivo pa cu su hendenan y menos futuro general di desaroyo pa cu nos Isla. Nos ta papiando aki di un politica di e problemanan serio y cu e consecuencianan abusivo pa cu nos hendenan.

Esaki ta un gobierno tirano cu hasta nan pastoor, awe parlamentario, ta tribi di papia di e bon comun den un forma di burla, paso e palabra aki ta wordo uza hopi door di otro partido. Pero e mester sa miho, cu esaki mester ta algo cu nos tur mester practica di un of otro forma, esey ta refleha e falta di comprension y compromiso y amor pa otro cu esunnan di e gobierno aki tin pa cu pueblo. Anto ainda nan ta papia cu ser humano ta central.

No ta trata di djis un aanwijzing como un sorto di straf pa Aruba, ta trata aki di e bienestar di cada un di nos den e dia cu nos ta biba aden. Ta trata di un gabinete di mil mascarada cu ta representa Aruba como gobierno, e gabinete aki tin un cara pa Hulanda y otro pa su hendenan. Un gabinete cu nan actonan ta hopi leu di e balornan fundamental cu cada un di nos aki na Aruba tin. Solamente e hendenan cu pensamentonan di desaroyo general, di e sistemanan social comun, di oportunidad husto, di amor pa nan mes como ser humano por forma un politica cu nos tur ta desea. Cu e gobierno aki esey sigur no ta e caso. Ta un deber y responsabilidad pa un union di husticia, esaki mester ta un acto di caracter patrimonial, e taki di e poder politico abusivo aki no tin mag di sigui crece. E principal obhetivo di un gobierno mester ta un calidad digno di bida social y no uno na nivel mediocre. 

Pueblo tin e derecho y mester exigi Gabinete Wever-Croes II transparencia riba e asunto di BAVP. Gabinete Wever-Croes II a introduci esaki na 2017 como medida temporal pa paga pa locual nan ta yama supuesto mega debe. E medida aki ta sutando pueblo keto bay despues di 5 aña. Awor pueblo mester exigi pa sa, cuanto placa e BAVP a genera te cu awe y cuanto di e mega debe a wordo cancela caba cu e belasting aki. Cua ta e opensaldo actual.

Nos tur ta pagando cu cada compra di producto diario 1.5% di BAZV. Lo ta na su lugar pa gobierno splica Pueblo vooral nos grandinan con por ta posibel cu awe nan tin cu paga pa nan remedinan na botica, mientras cu ya caba ta paga e prima di AZV y apart e BAZV. Cuanto BAZV a genera den e ultimo cinco añanan cu ainda pueblo mester paga pa su remedinan? Asina aki mes Gabinete Wever-Croes II kier aumenta e BBO na 7% cual ta inclui BAVP y BAZV anto ainda mas mester bay paga mas caro pa remedinan den 2023.

Pueblo di Aruba no tin mag di permiti pa hamas e gobierno aki duna Hulanda e oportunidad pa por logra nan meta di haci Aruba mescos Boneiro un Bijzondere gemeente. Esaki lo ta un bofta pa nos antepasadonan cu a lucha pa un Status Aparte cu un derecho y deber husto pa ambos banda. Mas Hulanda ta rek y laga e gobierno aki empobrece nos pueblo, di mes lo tin e motibo suficiente pa no tin otro alternativa cu ta basta y tuma over.

Staatssecretaris van Huffelen ta un intermediador entre reino y su miembronan pa cu cumplimento, pero e no tin e palabra absoluto riba e preocupacion nan y abuso cu e gobierno aki ta haci. Un aanwijzing ta un cos y palabra di pueblo ta otro cos. Hulanda por pone of kita un aanwijzing di mes forma cu nos ta pone, of kita un gobierno.

Awor ta e momento pa cada un di nos riba Aruba tuma nos responsabilidad como ciudadano cu tin derecho riba un estado administrativo y legislativo husto pa cu nos pais y cu e administracion aki ta uno hancra den leynan cu nan derecho-, deber- y consecuencianan.

Mescos nos tur a bay e urna electoral den gran masa pa nos mes pa medio nos voto, vocifera kende nos kier pa representa nos, di mesun forma den gran masa pueblo mester sali na defensa di bienestar general di Aruba y su ciudadanonan. No ta Hulanda mester cambia e storia di nos futuro, sino ta nos mes tin cu para keto un rato y para pa nos mes . Pueblo den su totalidad mester uni y lanta contra e abusonan di Gabinete Wever-Croes II.

No tin grandesa di un patria basa riba dolor di un pueblo, sino riba bienestar y felicidad di cada ciudadano!