Sandra ꓧijmering-Yee (AVP): Aruba ta den necesidad di politica di accion y transformacion

A cera e temporada di Pasco Dia di Tres Rey deseando cada famia na Aruba y pueblo en general un bon comienso di aña 2023 yena cu bida, salud y cu Dios guia nos tur pa bira cada dia miho cu ayera, ta locual cu Sandra Hijmering-Yee a comparti. Alabes a probecha e oportunidad pa comparti cu Aruba su pensamentonan politico pa cu 2023 y futuro.

Analisando e dianan di fiesta, e forma con den diferente famia ta expresa nan mes riba politica y futuro na Aruba, a pon’e pensa cu politica lo ta supuestamente di ta algo mas simpel.

Candidatonan ta comparti nan opinion y nan plan politico, como posibel gobierno, cu pueblo unda cu a base di esaki pueblo lo evalua ken lo haya nan voto. Mas cu claro cu e compromiso cu e gobernantenan lo bay tin comunicacion habri y honesto cu pueblo y cu nan lo cumpli pa locual pueblo a vota pa nan.

Pero toch esaki no ta e realidad cu nos ta bibando actualmente aki na Aruba.

Aruba merece politiconan cu ta cumpli cu locual nan ta bisa y cu ora mester enfrenta un problema ta haci esaki den e cuadra di responsabilidad y sinceridad pa cu e pueblo. No manera Gabinete Wever-Croes II ta haciendo, evadiendo e realidad actual cu nan tin cu cada ciudadano aki na Aruba. Mucho menos fregando den pueblo su cara, cu nan ta haci y deshaci paso nan ta na mando.

E gobierno aki a mustra pueblo, cu for di cada skina nan a abusa di nan poder, contrario na locual nan a vocifera, principalmente riba integridad. E Gobierno aki no sa kico kiermen principio moral y bon comun pa cu nan mesun pueblo. Gabinete Wever-Croes II, forma door di un coalicion cu Raiz, a demostra di ta hendenan cu ta mira politica pa traha y sirbi nan mes so y no ta politico cu ta traha pa sirbi pueblo.

E gobierno aki ta gobernando den un bubble hermetico sin espacio pa abo como pueblo por gosa di un progreso na bienestar di un y tur.  Ta un berguensa cu di tanto ministerio resortando bou Gabinete Wever-Croes II, ta Geoffrey Wever y Dangui Oduber ta e uniconan cu ta purba di traha pa pueblo.

Ta scucha tur locual diariamente ta menciona den varios medio di comunicacion, cu nos por sinti un tension, e pueblo di Aruba ta bibando riba un exceso intensivo di sentimento cansa / harta di e politica cinico di e gobierno di Eveline Wever-Croes y coalicion.  Pa e motibo aki ta necesario pa pueblo di Aruba mira riba direccion di e cara/politiconan nobo cu ta dispuesto pa traha pa e bon comun y e desaroyo general di nos isla y tambe di e politiconan cu a demostra caba cu Aruba ta na prome luga.

Pa por hiba Aruba na un miho nivel politico y mustra mundo cu nos na Aruba ta capaz di sali hunto uni pa dilanti, nos mester uni como pueblo y laga un banda e sentimento di apatia cu nos ta bibando aden. Cu apatia ta haci referencia na e forma con como pueblo tin un desinteres y demotivacion of falta di animo pa tur locual ta pasando y nada ta wordo haci. Nos ta comportando cu un indiferencia na cualkier situacion externo cu no ta encera bo mes cas paso no ta gusta deal cu politica.

Pueblo mester compronde cu participacion politico ta un mecanismo cu ta inclui nos tur.  Politica ta gobierno, ta e politico, ta e partidonan, ta e decisionnan pa cada un di nos, ta abo, ta futuro di bo trabao, bo esfuerso, ta bienestar di nos tur. Como tal nos como pueblo riba un isla democratico mester tin semper un postura analitico, critico y di accion.

Aruba tin un necesidad pa habri caminda nobo den politica, cu hende cu kier transforma e politica di nos sociedad ,den uno cu lo sembra un speransa di amor y perseverancia cu oportunidad den e bon comun desaroyando un isla grandi den oportunidad pa un y tur. 

Esaki lo por logra solamente si nos tur realisa y acepta cu politica ta inclui nos tur den un of otro forma y cu nos no por permiti nos mes ta indiferente pa e problemanan cu consecuencia grave cu e gobierno aki ta hibando cada un di nos, ta locual  Sandra ꓧijmering-Yee ( AVP ) a finalisa cu ne.