Ryçond Santos do Nascimento: Ursell Arends tin cu stop cu su maneho den mochi

Tin hopi preocupacion pa loke ta Bubali Plas. Cada biaha ta scucha hende ta keha mas y mas di e holo den e area y cu ta cerca di varios establecimento turistico.

mr. dr. Ryçond Santos do Nascimento, Parlamentario independiente, a comenta cu no ta traha riba e normanan, esey t’e problema. No ta traha riba un maneho cu ta mira full e aspecto di medio ambiente y full e aspecto di maneho di desperdicio.

No ta hacie y como consecuencia no por tin un control tampoco. Pasobra si no tin norma, no tin nada pa controla. Ora cu tin norma, e ora tin algo pa controla, segun e parlamentario. E resultado ta cu awe ta core banda di Bubali Plas, ta core banda di e hotel area, ta core banda di Parkietenbos ora cu ta bay mas den direccion Sero Tijshi y mas caminda na Aruba, cu e holo ta mata. Esey t’e realidad.

Tur rond di Aruba ta haya problema cu holo, ta haya problema cu zonido, ta haya problema di varios indole, pa simplemente no tin un maneho manera debe ser. No tin un e normanan manera debe ser y tin hende ta bisa cu si tin norma internacional, pero no ta asina.

Mester traduci nan pa nos situacion aki na Aruba. No mester solamente traduci nan pero converti e parti di control riba esakinan. Si no haci esey, nada no ta cambia. Si no ta bin cu maneho cu ta mira tur aspecto ta sigui cu e trabao di lapi lapi, ta sigui cu e trabao na mochi mochi, manera cu a bin ta haci pa hopi aña largo y esaki mester cambia.

Tin un miho manera pa soluciona e problemanan aki. “Ban hacie,” e parlamentario a bisa. Pensa riba e problema, analisa kico t’e causa di e problemanan y formula solucion. E no ta un ‘rocket science’, pero e ta tuma boluntad politico y un tiki sentido comun.

MANEHO DI MINISTER

Minister Ursell Arends a haci un forum riba Dia di Mama Tera y pa bati riba pecho cu a pone algo riba agenda ta great, pero mester mira e realidad. Por ehempel e cuestion di duna un personalidad huridico na naturalesa. Naturalesa no por papia pa su mes. Un hende mester bay defende naturalesa, papia den nomber di naturalesa. Mescos cu un mayor ta papia den nomber di su yiu, ken ta bay papia den nomber di e paharitonan, e parlamentario ta cuestiona.

E ora sa precies unda e minister ta bay cu su maneho. Pasobra esey ta loke a bin ta wak di e minister aki. Si ta bin cu maneho cu ta realmente ta atende cu henter e aspecto di medio ambiente na un manera cu mester ta, e ora e parlamentario lo aplaudi. Pero esey simplemente no ta realidad. E ta un maneho na mochi mochi y esey ta loke por a mira tur dia, Santos do Nascimento a bisa por ultimo.