Ryçond Santos do Nascimento tabata e unico orador for di Aruba den InterExpo

Miembro di fraccion di AVP mr.dr. Ryçond Santos do Nascimento tambe a participa den e InterExpo den Tweede Kamer Nieuwspoort na Den Haag.

Den e di dos dia di e evento, e enfoke tabata riba reino for di perspectiva di e ciudadano. Esey ta nifica pa mira kico t’e problema ora ta trata di enseñansa, pa wak kico t’e problema ora ta trata di pobresa. Pa wak kico t’e problema ora ta trata salud.

Na momento ora papia di reino, ta papia di Hulanda for di perspectiva kico t’e necesidad y di e bon comun, for di e perspectiva di loke ta trata siguridad cu tin un bida digno. For di e perspectiva ey por mira e relacionnan di reino completamente diferente.

Segun e parlamentario, e ora ta wak como pais Aruba mester di e lasonan strategico. For di e punto di bista ey un relacion cu Hulanda ta importante. Pasobra hunto cu Hulanda y hunto cu e otro partnernan den reino, por bay traha hunto pa por soluciona e problemanan di e ciudadano. Pasobra gobernacion y vooral autonomia, no ta un derecho so. E ta un obligacion, un obligacion pa por cumpli cu e necesidadnan di nos pueblo.

Santos do Nascimento tabata e unico orador for di Aruba den e InterExpo, caminda cu el a haya diferente pregunta di e audiencia, unda cu por a interactua. Tabata un debate basta amplio riba e necesidadnan y con mester bay den futuro den reino.

Pa e parlamentario tabata un honor cu e tabata e unico orador di Aruba, cu a haya un invitacion pa participa den e congreso aki. E tin di haber cu su mesun aporte n’e topico, pero tambe  ta hopi valioso pa por desaroya un propio opinion y tambe pensamento riba e echonan aki. Si no hacie for di Aruba, locual ta bay pasa ta cu e echonan aki, ta haya nan imponi. P’esey ta hopi importante, cu Aruba como pais, ta inverti den su propio educacion, p’e hobennan por aporta n’e discusionnan importante den reino.

Ta hopi importante pa por kere cu por, pero no ta suficiente. Mester prepara pa por duna un contribucion. Esaki ta un mensahe pa henter pueblo di Aruba. “Abo como ciudadano ta sumamente importante p’e direccion cu nos gobierno ta hiba y ta sumamente importante, abo ta importante p’e direccion cu gobierno di reino ta tuma. Na momento cu abo, como ciudadano ta critico, abo como ciudadano ta yuda pensa riba solucion, e ora bo impacto riba politica na Aruba ta bay bira hopi mas grandi y bo impacto riba e politica di reino tambe lo aumenta hopi,” ta loke e parlamentario a comenta.

Pa mas detaye lesa TREMPAN.