Ryçond Santos do Nascimento (AVP): Hulanda kier evita duna KB na un gobierno cu tin mal gobernacion

Diabierna awo Rijksministerraad ta reuni riba e topico di KB y nan tin di tuma decision si Aruba ta hay’e, pero ta mira cu Hulanda kier evita esaki pa Aruba. Bou mando di e gobierno aki por mira su mal gobernacion, pasobra cada ken ta sintie den nan cartera.

mr. drs. Ryçond Santos do Nascimento, parlamento di AVP, a indica cu n’e momentonan aki Hulanda ta pasando dificultad grandi. E politica ta super polarisa na Hulanda. Santos do Nascimento a duna un ehempel cu Thierry Bauded a haya un schorsing, pero prome cu esey ya caba nan a kita spreektijd fo’i dje. Esey kiermen e situacion politico ya caba ta polarisa na Hulanda.

Tin e crisis di stikstof, crisis di vivienda, winter ta den porta y tin problema cu gas, Hulanda ta den problema grandi. E parlamentario ta kere cu Hulanda den tur forma ta purba evita e KB. Ta necesario cu gobierno bin c’un plan cu ta convence nan cu al menos nan ta moviendo den e direccion corecto.

Parti di locual gobierno a haci ta probecha cu e economia cu a bons bek, a percura cu nan por a bin cu miyones mas na entrada ariba papel. Banda di esey a corta riba overtime, tambe a corta den paga cierto responsabilidad e aña aki. Nan ta bezig ta schuif cos pa otro aña. Cft ta dunando un advertencia p’e tipo di accionnan aki cu en realidad ta gaña wowo cu cos ta drechando, pero realidad ta halando e problemanan pa otro aña.

Si Hulanda pa motibo di situacion politico eynan no ta dispuesto pa actua, Santos do Nascimento ta premira cu e situacion pa Aruba mes ta bira hopi mas grave otro aña. Por mira specialmente e parti di awa y coriente hopi duidelijk cu tin mal gobernacion y ta sintie den cartera.