Rudy Lampe (RED): Minister Endy Croes ta contrata pensionado mientras tin diesseis docente nobo ta warda trabou

Diaranson mainta partido RED a tene un conferencia di prensa caminda a toca diferente punto di preocupacion. Ex-minister di Enseñansa dr. Armando Rudy Lampe tambe a hiba palabra caminda cu, na prome luga a desea caba studiante cu a sali durante e dianan aki rumbo Hulanda pa sigui nan estudio superior, tur clase di exito, pa despues elabora riba algun tema cu ta di importancia.

dr. Rudy Lampe a expresa cu durante gobernacion cu el a forma parti di dje como minister, el a sa di amplia y brinda mas opcion di estudio, mirando cu e interes di studia na Merca, Canada y den region tambe a subi.

Lampe a duna di conoce cu bou su maneho ,a habri institucion educativo na nivel di highscool na ingels, caminda por ricibi un diploma y asina por sigui estudio corespondiente. Al igual a cuminsa awo cu e opcion di bachillerato na idioma spaña, pa asina brinda e opcion di sgui un estudio den region por tin esaki como escogencia.

Tur esaki pa habri mas opcion pa futuro di nos hobennan cu ta desea di studia, ademas di e opcion di Hulanda. Na mes momento, a corda riba idioma Papiamneto, a acelera e proceso di plan di introduccion di scol Arubano multilengual na tur scol y den un tempo mas rapido, pa asina brinda espacio pa papiamento por drenta como idioma di instruccion den enseñansa.

Ex-minister Lampe ta haya lamentabel cu na e momento aki tin un grupo di 16 persona, gradua cu bachelor den idioma Papiamento na IPA, ta sin trabou.

Den gobernacion

Lampe a enfatisa cu na momento cu e tabata den e cargo, a percura pa duna atencion na prome luga, na e pensionadonan, pa poco poco nan habri espacio pa asina duna esunnan mas hoben luga pa drenta. A atende e problematica di overuren y asina crea cupo di trabou.

E ta conciente cu tabatin hopi protesta, pero den su bista Goberna kiermeen premira, planea pa esunnan cu ta finalisando nan estudio por drenta den enseñansa. A te asta flexibilisa locual ta exsigencia di antes, cu cooperacion di Hulanda pa haci posibel cu esun cu tin bachelor den Papiamento, por drenta enseñansa basico tambe.

Kico ta tumando luga na e momento aki

Ex-minister Lampe su preocupacion ta sinta awo, cu ta observa e minister actual Endy Croes keto bay ta contrata pensionado y no atende cu e grupo di recien graduado di IPA cu ta sin trabou. Ta increibel di mira cu ta na Aruba, e unico pais na mundo, caminda ta haya docente cualifica y sin trabou.

E ta di opinion cu ta importante pa maneha e presupuesto di enseñansa, cu por crea espacio pa contrata esunnan cu ta cabando nan estudio pedagogico na IPA.