Rolando Maduro (SPA): Prioridad no ta polis extraordinario (BOA) pero polis di berdad cu por actua

Recientemente gobierno, ATA conhuntamente cu AHATA y Aruba Hospitality and Security Foundation a plantia e idea di reintroduci Tourism Sector Patrol, un tipo di visibility team, cu tabata un proyecto cu ex-altocomisario Ronny Bernadina a ehecuta na aña 2000 mas o menos. Contrario na biaha pasa, e biaha aki minister tin intencion di nombra e security guardnan aki como un bijzonder opsporings ambtenaar of polis extra ordinario (B.O.A) , cu ta un caminda basta leu.

Prome cu algo asina sosode lo tin cu cambia ley, manda e personal aki Scol pa Polis pa por duna nan les pa por skirbi un proces-verbaal, siñanan carga y uza arma y siñanan e leynan cu ta mara na ehecucion di nan funcion. Pues no ta nada di anochi pa mainta, sino un proceso cu lo dura algun aña. Esaki no ta refleha e urgencia cu AHATA ta papiando di dje, cu ta un necesidad di mañan mainta mes. No aki cinco aña!

Pensamento critico riba e tema aki ta pone cu tin cu pone atencion cu na 2023 ta bira e di tres aña cu no tin un klas na Scol di Polis y cu cada aña cu no tin un klas, ta nifica cu aki par di aña lo bay paga pa e decision aki. Completamente robes, ta bay emplea security en bes di emplea polis.

Rolando Maduro, vice-presidente di SPA, a duna su punto di bista riba e topico aki y e ta mixto. Tin su puntonan bon pero tambe esunnan di atencion cu ta preocupante. Entre otro momento cu ex-miembronan di e visibility team den pasado a haci mal uzo di nan funcion, a secuestra hende, a horta, uzando nomber di Cuerpo Policial Aruba. 

Mester tene bon na cuenta cu e hendenan aki ningun dia ta polis. A surgi algun incidente tambe caminda nan a bay banco, haci debe y lanta bay biba afo lagando debe grandi atras y ta bira un topico delicado pa atende cu ne. Di otro banda, como polis nan si ta mara na ley y si haci algo robes mesora landsrecherche y/of BIV (BIZO) ta presenta. Tambe tin cu tene na cuenta cu e no ta factibel pa laga un civil integra den un cuerpo di polis, ta locual Maduro a indica.

A compronde cu minister a informa cu lo haci screening pero di experiencia ta consciente cu esaki no ta funciona. Algun excepcion por ta personal di CEA cu tin un BOA opleiding, ta bin di ambtenarij y sa nan responsabilidad y nan ley. Nan tin hopi aña caba trahando y a demostra nan capacidad. 

Durante reunion cu Minister di Husticia a indica cu palabracion ta riba mesa ainda, tin cu sinta cu altocomisario y Korps Management Team (KMT) y asina mira con esaki lo evoluciona. Rolando Maduro den representacion di e sindicato tambe ta curioso pa sa con lo yega na un cambio asina aki di ley.

Segun a compronde, intencion ta pa duna un curso pero esaki no tin posibilidad di bira un BOA como cu esaki ta mara na ley y mester ta un ambtenaar pa por yega na esaki. Den otro palabra kier bay inverti y incorpora un grupo di hende pa bira ambtenaar y despues duna nan BOA, anto e ora ta miho habri un klas na scol di polis y asina yega na 50 polis extra, cu ta haci hopi falta. Actualmente Cuerpo Policial tin como 200 polis di menos. Y pa yena e bashi ey, SPA ta conseha pa recluta 50 polis pa aña.