Rodney Solognier (SPA): Gobierno a tuma decision adhoc

Rodney Solognier, presidente di SPA, a indica cu gobierno ta bisa cu nan no tin placa, esey semper ta nan excuus. Pero e flamante gobierno ta biaha na tur momento, core auto caro, ta gasta placa, abusa placa di pueblo. Pa nan ta dushi, pa nan sinta bon y no tin placa pa siguridad. Aki el a papia di polis so. Pero pa loke ta Aduana, brandweer tambe ta den mesun wega.

E no tabata sigur pero pa loke ta trata brandweer, segun Solognier, si cierto cos di overtime bin aden, no tin bombero pa traha. El a indica cu probablemente nan ta keda cu exactamente e cantidad di personal pa traha na aeropuerto y esaki por funciona p’e turismo por baha cu e avionnan, segun regla di FDA.

Si nan no soluciona e problema y dia di mañan bin un candela manera a pasa, tin cu cera aeropuerto p’e poco bombero sali di kazerne na aeropuerto pa paga e candela. Esey ta pone cu aeropuerto tin di bolbe cera, pero ta pone cu aeropuerto mester bay paga miyones na schade vergoeding p’e avionnan cu no por baha, el a indica. E ta haya cu e cosnan aki tin di stop.

“Nos sa kico ta come y bebe tra’i tur e situacion aki”, el a indica. Gobierno a tuma decision adhoc, sin consulta cu e sindicatonan. No a mira kico ta e miho manera pa ehecuta e situacion. “Nos ta compronde cu tin situacion, berdad. Nos no ta bisa no tin situacion, nos ta manera antes”, el a expresa. Nan ta compronde, incluso a dedica dos aña y pico ta entrega 12.6% y esey tabata algo inhusto.

Asina mes nan a compronde, a pesar di a bringa pa nan derecho. Awo e sindicatonan ta bin cu e situacion di overtime y mañan nan no por garantisa e siguridad di pais Aruba.