Robert Laveist: Nos ta cla pa enfrenta si mester e famia di Yohana perdi den lama di Aruba

Tur cos a cuminsa cu un biahe pa trece un dama Venezolano for di Venezuela pa Aruba. Un biahe ilegal. E señora Leidy Yohana Salazar Lorza di 40 aña ta mama y tin yiu ilegal na Aruba y tambe e mes tabata tin un casa na Aruba. E yiu di Yohana mes a caba di bira tata cu un otro damita ilegal. E mama Yohana a keda deporta algun luna atras.

E tabata tin algun aña na Aruba y nunca a regla su papelnan. Parti di su famia ta na Aruba. Pesey e kier a bolbe pa sigui su bida. Logicamente cu avion e no por drenta. Algun tempo a purba cu crusero pero nan no a lag’e baha na Aruba. Robert Laveist ta un persona cu tin boto y a cordina e biahe. A cobra 2500 dollar pa asina trece Yohana Aruba. Boto di Robert Laveist a sali bay zuid y na mitar caminda a recohe Yohana. Mirando cu Laveist tin poco quebrante di salud, a pidi su bon amigo Riangelo Stamper pa haci e fabor y bay recohe Yohana mita caminda. Segun Laveist Yohana mes a bula na awa. Aunque a bisa cu e no sa landa, ta for di awa a sac’e y pone den boto pa trece Aruba.

Segun Robert Laveist a sigui conta, Yohana mester a bin cu otro grupo. Pero e tabata pura pa bin y a gaña su famia etc y a bin su so den boto cu e capitan Riangelo Stamper. Yohana a manda grabacion voicenote cu e ta bin Aruba pero den yate. Cu e ta paga 2500 dollar pero yate lo trece Aruba. Den e voicenote e ta bisa tambe cu e no sa landa y no ta bay risca bin den cualkier boto cu mester bula na awa pa yega tera. E botonan ey segun voicenote di Yohana ta cobra 400 dollar y esey ta un riesgo pasobra e no ta landa. Asina mes el a escohe e boto tipo lancha di Laveist pa bin Aruba. Yegando tera nan a señala Wardacosta na costa y a avisa Stamper riba lama cu Wardacosta tey. Aki a dicidi di tuma e paso cu a costa bida di Yohana. Segun Robert Laveist, Riangelo Stamper a bisa Yohana pa haci comosifuera e ta su pareha si Wardacosta mete cu nan. Segun Laveist, Stamper a bise cu Yohana no tabata kier.

E mes a dicidi cu e lo bula na awa. A sigui splica cu ta na algo mas cu 100 meter di tera Yohana a bula den lama. Riangelo Stamper a yega tera sin cu a pone man riba dje. Finalmente Yohana no a yega. Robert Laveist a avisa e famia di Yohana na Aruba mesun atardi. E yiu lo a bisa Laveist cu su mama ta guerrera y e lo ta scondi wardando cos calma pa e por sali. Anochi Yohana no a yega cas. Laveist ta bisa cu e kier a bati alarma mesora pero ta yiu di Yohana mes no tabata kier. Dia despues a cuminsa mobilisa shelo y tera pasobra nan no sa di Yohana. Robert Laveist a bisa cu el a gaña Wardacosta cu un boto a bin cu shete hende y seis a yega tera. Tabata pa nan activa mesora y sali. Leveist a bisa cu nan mes a sali mas cu un dia cu dos boto y Wardacosta tambe a sali busca.

Nan no a topa cu Yohana dos of tres dia di buskeda. Nan kier a debolbe 2500 dollar paga bek na e yiu pero el a bisanan usa esaki pa gasolin pa e botonan por sali busca e mama. E yiu mes a bay cu nan den boto pa busca e mama. Te awe no a topa nada. Via rednan social autoridad Venezolano a sigui e informacion y a haci varios detencion na Venezuela. Esey a pone cu e informacion a bira cayente tambe pa esnan na Aruba envolvi na Aruba. Tin un Venezolano mas cu tambe ta na Aruba cu ta e persona cu tambe a cordina e biahe di Yohana pa Aruba. Robert Laveist a bisa cu Yohana a gaña su famia hopi. Ningun hende tabata sa cu el a sali su so den boto pa Aruba. E plan tabata pa sali cu mas hende den un biahe. Ta un fabor nos a haci Yohana segun Laveist. Cos por bay malo y aki cos a bay malo.

Awo famia ta menasanan. Nan no a menasa ningun famia manera nan ta insinua. Alcontrario nan a haña yamada di hendenan yega na Yohana pa topa. Ora nan a bay a mira un grupo di mas cu ocho hende. Robert Laveist a bisa cu el a bay prepara su soldatnan tambe y bolbe pa reuni cu e conocirnan di Yohana. Nan a bay prepara pa tur cos segun Laveist. Tambe Laveist a bisa cu e lo no laga Riangelo Stamper den e guerra aki. Si nan kier mete cu Stamper, nan mester pasa riba su alma prome. E tey pa defende te na morto Riangelo Stamper. Nan ta cla pa tur cos segun Laveist. Nan a haya menasa y auto a siguinan. Esey no ta spantanan. Abogado a conseha Laveist diamars pa nan no declara nada ainda.

Mirando e presion cu ta bin riba nan, a dicidi diaranson pa sali papia y splica ki tur a pasa. E ta un riesgo y aki cos no a bay bon pa culpa di Yohana mes. Ya caba nan a bay polis cu a laga sa cu nan no tin nada contra nan. Ta autoridad Venezolano a duna informacion y di Aruba mes tur cos ta keto segun Robert Laveist. Lo keda pendiente pa mira ki direccion e caso aki lo tuma. Awo a tende tambe cu piscadonan lo a mira e curpa di Yohana sin bida den lama bou di poco yerba. Nan no a logra sac’e mirando e coriente cu tabata fuerte. Nan a confirma na Robert Laveist cu discripcion di paña y ainda e tabata tin vest bisti. Cu e coriente fuerte tabata dificil pa Yohana por a yega tera. Kizas e declaracion di e piscadonan aki tambe ta importante. Mientrastanto famia ta sigui preocupa cu tur loke a sosode y ta buscando tambe husticia.