Ricky Hoek (MEP): Uzo di substancia y adiccion ta un preocupacion

E problema persistente di uzo di substancia y adiccion ta un preocupacion global. Na Aruba tambe e ta un preocupacion. Esaki ta afecta tanto e sistema familiar y comunidad.

Ora ta papia di uzo di substancia, ta referi aki na uzo di alcohol, tabaco, droga (marihuana, cocaina y otro) y medicamento prescribi. Ora un persona ta uza un substancia te na e punto caminda su relacionnan y e habilidad di haci su tarea- y actividadnan diario ta afecta of e persona ta comete un crimen bou di influencia, por bisa cu e persona aki tin un problema cu uzo di substancia. 

Hopi bes ta considera problema di uzo di substancia y adiccion como un problema cronico di e circuitonan den e celebro cu ta relaciona cu recompensa, motivacion y memoria. Adiccion ta afecta e neurotransmision celebral. Pues e habilidad di e persona cu tin e trastorno di controla su propio uzo di substancia, specialmente ora e ta bou di influencia. 

Uzo excesivo di substancia y tambe adiccion ta afecta e persona en cuestion, su famia y comunidad den asina tanto forma. E persona por perde trabou, deterioro di salud fisico y mental, aumento di crimen y violencia, situacion economico precario y reduccion di calidad di bida. Asina aki e comunidad tambe ta keda perhudica pasobra ta bay tin mas desempleo, problema cronico di salud (p.e. diabetes, riñon), mas violencia den cas di famia, consecuencia fatal den trafico y probresa. Tur ta conduci na problemanan social structural.

Actualmente y den futuro Aruba lo por lidia cu e problemanan social structural aki? Aruba lo tin ciudadanonan saludabel suficiente pa traha na su progreso? Acaso Parlamento di Aruba mester bin cu ley mas severo cu ta pone e persona cu causa un di e problemanan aki para responsabel pa su actonan? Por ultimo, prevencion y conscientisacion di uzo di substancia mester keda reenforsa pa asina mitiga e problemanan social den nos comunidad.