Ricky Hoek (MEP): Dos siman dialogando cu Minister Arends pa parkeo pero ainda nada

Mirando e publicacion di 24ora.com relaciona cu e sticker riba auto di Parlamentario Ricky Hoek pa para malo, e parlamentario a dicidi di duna su banda di medaya. Aruparking no ta pone sticker riba auto di hende pasobra nan ta para bon, ta pon’e pasobra ta kibra regla, locual a Ricky Hoek cu a score no menos di 135 voto a haci. Segun e parlamentario, e tin dos siman na mesa cu Minister Ursell Arends pa regla e asunto di parkeo pa parlamentario pero te ainda ta den tramite.

“Desde 29 september 2021 a sali den tur medio di comunicacion cu 20 espacio di parkeo (parkeervak) lo keda asigna na e parlamentarionan. E espacionan di parkeo aki lo ta den e parkeerplaats dilanti di Renaissance Marketplace. Sinembargo, e parkeonan asigna na e parlamentarionan ta uza pa tur automobilista cu yega na e sitio aki”, asina e relacionista publico di MEP den Parlamento a skirbi pa Parlamentario Ricky Hoek, relaciona cu e sticker cu AruParking a plak riba su auto diabierna atardi pasobra el a parkeer ilegal!

“Riba 22 di october 2021 a anuncia den tur medio di comunicacion, incluso 24ora.com, cu e biaha aki lo pone borchi di parkeerplaats pa e parlamentarionan. Lamentablemente, ni cu e borchi nan aki, te dia di awe e parkeonan asigna pa parlamentarionan no ta wordo respeta”, segun e relacionista publico di MEP a skirbi pa Ricky Hoek.

E parlamentario ta reconoce cu riba diabierna atardi, dia 7 october 2022, 24ora.com a bay live y a sorprende dos colega parlamentario saliendo for di trabou cu preguntanan encuanto parkeo. “Loke mas ami ta condena ta e echo cu e reportero di dicho medio di comunicacion ta duna informacion personal di mi y mi auto – unda e respet pa mi privacidad a keda? – y ta acusa mi cu mi a kibra regla di parkeo. Por ultimo ta duna informacion incorecto tocante di parkeo den cura di parlamento”, asina nan a skirbi pa Hoek.

Manera tur hende por a tuma nota, director di Aruparking a anuncia cu lo reactiva nan trabou desde 5 di october ultimo, cu riba e mesun dia aki e parlamentario a ricibi un sticker for di Aruparking riba su auto para den e parkeo asigna pa parlamentarionan.

“Pa crea sensacion y conmocion den pueblo, 24ora.com a core filma mi auto, e number di mi auto, menciona mi nomber y solamente lesa e orario cu ta para riba e sticker, sin menciona e fecha corecto. Di e manera aki insinuando cu mi a haya un sticker debi cu mi a para banda di e espacio di parkeer di Presidente di Parlamento di Aruba. Tambe e reportero a indica cu parlamentarionan tin un badge cu por uza pa staciona den cura di edificio di Parlamento di Aruba si no tin espacio dilanti. Esaki ta totalmente incorecto. Nos como parlamentario por parkeer solamente na e sitionan asigna cu borchi of sino despues di 4:30 pm por drenta cu badge pa parkeer paden. E motibo pakico mi tabata para na e sitio caminda 24ora.com a bin filma mi auto, ta pasobra ora mi a yega parlamento 2:00 pm pa atende un reunion importante, un bes mas tur parkeo di parlamentario tabata yen cu auto cu no tin permiso pa para na e borchi di parlamentario.”

Mas leu e parlamentario a laga sa cu “Loke 24ora.com tampoco sa, ta cu mi persona tin dos siman caba ta dialoga cu Minister Ursell Arends riba e asunto di parkeo pa parlamentario y cu te ainda ta den tramite di yega na un solucion concreto.”

Finalisando e ta subraya cu e no tabata mal staciona y tampoco a kibra regla di parkeo. “Mi ta urgi 24ora.com pa informa pueblo corectamente y pidi pueblo pa respeta e espacio di parkeo asigna na parlamentarionan.”

Riba esaki 24ora.com kier puntr’e: Dicon Aruparking a plak bo auto cu sticker anto?