Richard Frank (VWI): Silencio di Ton Rojer ta bisa hopi! 

Minister di Energia, Glenbert Croes, a trece dilanti durante su conferencia di prensa di dialuna diferente ponencia riba e preocupacionnan cu Directiva di Asociacion di Empleadonan cu un Contrato Laboral Individual den Servicio di W.E.B. Aruba N.V. (VWI) a trece dilanti. VWI no ta di acuerdo cu esakinan y a indica cu no tin nada politica. VWI kier sa dicon ta keda mantene e rapport, cu Utilities a laga traha, un secreto.

Richard Frank, presidente di VWI, a indica despues di a tende kico e mandatario a bisa e parti absurdo cu e mandatario a bisa cu VWI tin conexion politico. Esaki no ta di berdad. Nan problema no tin di haber cu politica pero sino cu Utilities Aruba N.V., unda cu nan punto ta riba e molina di biento na Rincon. Esaki ta lidera pa Utilities y e compania estatal ta traspasa su hurisdiccion, pero su statuto ta bisa cu nan no por haci esey.

Siman pasa diesun pa diesdos gremio a reuni cu e directornan di Utilities y WEB, unda a duna un carta. Aki a pidi pa un opinion independiente di un grupo di experto di corporate governance riba esaki. A pasa un siman cu nan a entrega e carta y te awo nan no a haya ningun contesta di esaki. Frank ta kere cu e silencio di Anthony Rojer riba esaki ta papia hopi, aunke ta warda riba su contesta si e sondeo ta sigui.

NON-DISCLOSURE AGREEMENT

Pa loke ta trata e rapport di Abreu, segun Frank, tin hopi Non-Disclosure Agreement. VWI kier sa pakico tanto secresia, pakico tanto Non-Disclosure Agreement, kico tin di sconde. VWI kier pa saca e rapport di Abreu publico, pa asina nan por splica pueblo pakico loke e rapport ta recomenda no ta optimal p’e futuro energetico di e isla.