Richard Frank (VWI): Glenbert Croes y Ton Rojer ta hincando nan mes politicamente den operacion di WEB

Den un rueda di prensa teni na 29 di augustus 2022, su Excelencia Minister di Labor, Energia & Integracion, Glenbert F. Croes a duna di conoce cu e lo lanta vuelo bay Washington D.C. U.S.A. pa e bay “papia” cu e organisacion yama OFAC (Office of Foreign Assets Control), cu ta forma parti di e Treasury Department di Estados Unidos, pa purba di convence e organisacion Mericano aki pa kita of “suavisa” sancionnan contra Venezuela pa asina, segun nos Minister di Energia, por cumpra Heavy Fuel Oil (HFO) “mas barata” for di Venezuela pa WEB Aruba NV por uza.

Di e manera aki, supuestamente, lo baha prijs di awa y coriente pa pueblo. Un esfuerso aparentemente masha noble di nos mandatario cu e ta dispuesto pa biaha bay Merca y uza su y ‘fama’ mundial pa convence OFAC pa ‘suavisa’ e sancionnan poni riba Venezuela. VWI sinceramente ta puntra su mes riba cua planeta, of den cua dimension desconoci, nos mandatario di energia,  Glenbert Croes, ta biba. Glenbert Croes ta conoci caba den su carera politico pa a haci un hazaña similar di a busca “fuel oil mas barata pa WEB” den medio di añanan 1990 den su tempo den e partido OLA. A resulta cu Glenbert Croes su fabuloso adkisicion di “HFO mas barata” pa WEB na e tempo ey a resulta den un debacle formal cu a trece un cantidad di dolor di cabes den e operacion di e boilernan e tempo ey. Danki Dios cu WEB no tabata opera cu motornan den medio di añanan 1990 ora nos ilustre Minister Glenbert Croes di e tempo ey a forsa WEB cu un HFO malisimo.

Awe, mas di binti aña despues, nos ‘incansabel’ Minister di Energia, e mesun Glenbert F. Croes di e tempo di partido OLA, ta riba un odisea of aventura similar atrobe na Washington D.C. pa mira si por logra suavisa e sancionnan imponi pa Merca riba Venezuela pa, supuestamente, por cumpra “HFO barata” for di Venezuela. VWI no sa ta kende, of kendenan, ta conseha Glenbert Croes riba e materia aki, pero prijs di HFO, sea di Venezuela of di cualkier parti di mundo, ta stipula pa e calidad di e HFO: mas barata e HFO, di mas mal calidad esaki ta! Dus, bo kier fuel barata? Wel e ora ta rotsooi bo ta haya. Opera e motornan di WEB cu HFO cu ta di mal calidad ta bay man den man cu pidi problema grandi pa cu produccion confiabel di coriente. Mal calidad di fuel oil ta daña e motornan y te hasta por kibra e motornan! HFO di Venezuela, por lo general, ta conoci pa ta di un calidad sumamente malo.

Glenbert F. Croes ta canando un caminda cu ta slip masha hopi mes den un mundo di fuel oil cu ta tecnicamente, comercialmente y geopoliticamente compleho y di cual VWI ta convenci cu Glenbert Croes, ni su ‘conseheronan’, ta conoci cu ne. Den opinion di VWI, Glenbert Croes hunto cu Utilities Aruba NV y su grupo di ‘expertonan’ Venezolano, ta (atrobe) metiendo nan mes politicamente den operacion di WEB riba un tema cu ta e curason y sanger di e operacion confiabel di e motornan na WEB, esta e calidad di e fuel oil den uzo. “Lo barato sale caro!” Esaki sigur ta conta den e mundo di heavy fuel oil! VWI no sa si Glenbert Croes ta politicamente autorisa pa bay sinta na mesa cu OFAC. Esaki na nos parecer ta un trabou di Buitenlandse Zaken, un asunto di Reino y no di Land Aruba. VWI por ta fout den esaki.

Pero locual VWI ta sigur di dje ta cu Glenbert Croes ta canando un caminda cu por pone e operacion di WEB den un peliger inminente (mescos cu el a haci den añanan 1990). Loke VWI ta sigur di dje ta: HFO barata ta HFO di mal calidad! “Garbage in is garbage out!” Esaki ta conta sigur pa operacion cu motornan na WEB uzando HFO di mal calidad. Si en caso cu Croes logra mes cu OFAC (locual nos tin duda grandi aden) pa ‘suavisa’ sancionnan pa Venezuela, VWI ta duda sinceramente cu Venezuela ta bay ta asina ‘lief’ di bende nos HFO di bon calidad na prijs di baca flaco djis paso nos ta ‘One Happy Island’.