Ricardo Croes (RED): Rond mundo ta legalisa cannabis pero aki na Aruba ta persigui hende

Partido RED Democratico a tene nan conferencia di prensa y aki lider di partido a bay un biaha mas riba cannabis. Tambe nan ta haya cu gobierno no a traha riba un desaroyo economico, no a crea un pilar economico nobo.

Ricardo Croes, lider di RED Democratico, a indica c’un pais manera Hulanda ta cometiendo atrocidad grandi contra sector primario. Diferente mandatario di diferente pais ta cuestiona nan, ya cu nan a ripara cu algo no ta cuadra. Loke e ta haya ta straño, ta cu na Aruba masha poco hende, mandatario sigur ningun, no ta bin dilanti y realisa cu tin un capa unda esaki ta realisa bou dje.

Economic World Form a haci di e presidente- y prome ministernan, incluso esun di Aruba, practicamente un marioneta. Un persona cu ta djis participa den tur consecuencia cu por tin, tabata Croes su palabranan. Den e ultimo dos añanan, e paisnan tabata goberna c’un crisis verordening. Un ley cu ta permiti prome minister bira un oper bevelhebber, e mandatario cu ta carga responsabilidad di diferente otro ministerio cu no ta di dje so. E tin e ultimo palabra, un verordening cu mester a duna seis luna pero na Aruba a bay mas cu dos aña.

ACUERDO PA LEGALISA CANNABIS Mientras tur partido politico, cu excepcion di CURPA, ta di acuerdo cu legalisacion di cannabis. Tur partido politico sinta ta den gobierno y oposicion ta di acuerdo pa legalisa cannabis, segun Croes. Pero ningun di nan a cuestiona dicon te ainda nada a sosode, segun e ex-parlamentario. E palabra cannabis no ta den presupuesto, no ta zona den boca di ningun parlamentario ni mandatario. Ni e votadonan cu a vota pa legalisa cannabis no ta manifesta, ni reclama. Rond mundo ta legalisa cannabis, pero aki na Aruba ta persigui hende manera ta un criminal. Ta keda sinta y warda ki dia nan ta bin pa bo, sinta warda ki dia ta haci test di droga y perde trabou. Asina ey pa Ricardo cuminsa haya mensahe pidiendo ayudo, cu cuent’i pasa test di droga, asina el a indica. Ora e tabata den parlamento ningun hende a bin sosten’e.