Reunion di CHTA Marketplace sosteni pa A.T.A. y socio turistico

E siman aki, Aruba tabata presente na e evento mas grandi den e industria turistico y hotelero pa nos region cu a tuma luga na San Juan, Puerto Rico. E evento di Caribbean Hotel & Tourism Association ta duna e proveedornan di turismo e oportunidad pa cera conoci, reuni, of negocia sea cu e socionan existente of nobo.

E ehecutivonan di A.T.A. y AHATA y nos hotelnan/socionan local a enfoca primordialmente riba reuni cu tour operadornan existente y nobo. Presente di A.T.A. tabata CEO Ronella Croes, CMO Sanju Luidens-Daryanani, North America Area Director Ed Malone, North America Marketing Manager Ayerim Maduro y Communications Manager Sjeidy Dijkhoff-Feliciano. Di AHATA tabata presente CEO Tisa LaSorte.

E agenda tabata extensivo y a reuni cu 22 diferente socio, mas cu claro esunnan cu ta produci mas hopi bishitante for di Norte America pa nos destinacion tambe tabata inclui. E reunionnan manera esaki ta duna oportunidad pa negocia cualkier aspecto, si esaki ta rekeri. Tambe a papia entre otro di e ultimo trendnan pa 2023 y con turismo di Aruba ta compara cu otro destinacion den Caribe.

Durante e diferente reunionnan e socionan a reconoce cu e forma cu Aruba a comunica durante e pandemia y e esfuersonan cu a haci pa e recuperacion ta haci cu awe Aruba ta entre e destinonan cu un grado di recuperacion di mas halto den e region.

Mientras cu mas destino ta recuperando y tin diferente factor externo cu lo por influencia turismo pa Aruba y e region en general, 2023 ta trece diferente oportunidad pa nos isla y Aruba ta sigui posiciona su mes como un di e destinonan den top 4 den Caribe.

Aruba mester sigui enfoca riba e atraccion di e turista cu ta dispuesto pa paga pa un vacacion na Aruba, locual ta A.T.A. su strategia. Tambe mester sigui ta hopi prudente cu e balansa entre loke ta pidi pa paga y e balor cu ta duna.

E conferencia aki ta forma parti integral di e strategia pa logra e metanan pa 2023, riba nivel di cantidad di bishitante, entrada di turismo y entrada di cambernan di hotel.

A.T.A. ta mira bek riba un CHTA Marketplace fructifero y sigur inolvidabel mirando e ‘Destination Resilience Award’ cu ta trece cas pa Aruba.