MINISTERIO KONSERNÍ TRÁFIKO, TRANSPORTE I PLANIFIKASHON URBANO
RETRASO DEN TRABOUNAN DI KAYA DEBÍ NA AWASERU
PUBLIKÁ RIBA 23 SÈPTÈMBER 2022
Willemstad – Teniendo kuenta ku e yobida di awaseru ku Kòrsou a eksperensiá , e trabounan di mantenshon di kaya ta sufri un poko retraso. Ta trata aki sigur di trabounan riba Don Martina Boulevard (Nieuwe Haven).
Pa trabou di asfaltamentu di kaminda tuma lugá, e kaminda mester ta bon seku. Si no, e trabou lo no tin efekto i e kaya ta bolbe daña den korto tempu.
Servisio pa Obra Públiko (OW) ta sigui vigilá e situashon di wer, i mirando ku esaki a kuminsa klara, lo trata na sigui ku trabounan di mantenshon di kaya. Ta pidi tur outomobilista pa trafiká ku koutela den e áreanan ku ta trahando mirando ku e awaseru por a afektá e estado di e karetera aun mas.
