Reto y logro di Sindicato di Maestro di Aruba (SIMAR) pa 2022

Sindicato di Maestro di Aruba ( simar ) ta mira atras riba un aña 2022 cu ta yegando su fin. Un aña yena di reto manera semper pero cu uno cu keto bay ta vigente y ta esun di e recorte salarial cu a habri y ta cerando aña keto bay eynan.

Den union cu e diferente otro sindicatonan, a hiba un lucha durante full e aña 2022 caminda mester a bringa te den corta pa derecho como cu gobierno a opta pa hiba e sindicato dilanti mesa berde. E lucha den corto tin di haber cu e recorte di 5% cu na ningun momento lo por ta a costo di nada na momento cu debolbe esaki. Sindicato a para firme riba e punto aki y a indica di lo bay traha a base di locual cu nan ta cobra.

Un acuerdo cu no por a yega na otro entre e sindicatonan y gobierno, cu a haci cu nan a mira otro den corte. Josephine Albertus, presidente di sindicato SIMAR, aunke den un etapa di transicion/ presidente saliente a sigui na bisa cu di cierto forma a sinti cu gobierno kier a busca un manera pa silencia e sindicatonan y evita na tur forma un of otro manifestacion di parti e sindicatonan den union. Un hues imparcial mesora a indica cu esaki no por, cada hende tin e derecho na manifesta nan disgusto.

Locual cu no a logra haya un veredicto na nan fabor, tabata e punto di traha segun locual nan ta traha p’e, pero ta satisfecho si di por a mustra, den representacion di tur e diferente veld, cu nan a para firme y no a sigui acepta e maneho di e gobierno caminda tabata corta den salario.

E union a haci e forsa.

A logra recupera e 5% di nan salario sin nada a cambio aunke keto bay ta en espera di e 7.6% cu gobierno a indica di lo ta elimina den su totalidad pa e aña venidero, esta 2023.

Un lucha cu a dura aproximadamente 2 aña y cu sosten abrumador di tur cu a forma parti di esaki. Di su banda, Josephine Albertus ta gradici un y tur cu a bringa y felicita nan pa e para hunto den e lucha. Pabien.

Pa locual ta trata e landspakket, tin algun punta cu ta regarda e posicion huridico di e trahado, caminda sindicato a para keto pero raportando na cada miembro locual cu ta intencion di gobierno riba cada cambio cu e landspakket ta bin cu ne. E mandato di e miembronan ta locual e sindicato lo bin dilanti cu ne pa asina vocifera, no na nomber di SIMAR pero na nomber di tur esunnan den e veld cu nan ta representa.

Aña 2022 tambe a trece oportunidad di grandesa y cultiva conocemento. A biaha y traha den colaboracion cu diferente isla manera entre otro Trinidad and Tobago y uni cu Education International y tambe e Caribbean Union of Teachers y for di prome di december SIMAR oficialmente ta miembro di e union aki, pa asina traha hunto como sindicato den enseñansa y amplia nan conocemento como tambe sosten.

Adicional tin di menciona cu a bishita hermana isla Corsou caminda a haya oportunidad di comparti y gana conocemento valioso for di tur presente, entre otro Sint Maarten, Surnam y Corsou. Ideal pa asina yega na union pa trata y principalmente para hunto riba locual ta e landspakket.

For di esaki a reuni un biaha mas na Aruba mes caminda a presenta hunto un carta dirigi na staatssecretaris di Hulanda, Van Huffelen primordialmente riba e punto di e 12.6 %.

SIMAR ta mira un 2022 sumamente importante, como sindicato a fortifica nan lasonan na Aruba mes cu diferente gremio, no solamente sindical pero tambe comercial caminda a sali y para hunto. Josephine Albertus ta refleha riba un aña exitoso den crecemento como sindicato, reto no ta algo cu lo caba pero ta orguyoso di locual cu a logra y locual cu a para p’e. P’esey e sindicato t’ey y lo brinda sosten na e veld na cualkier momento cu mester di dje.