Relaciona cu Verlof di Paternidad na Aruba: Su prolongacion por tin un efecto positivo p’e famia

Gillmar Werleman y Maidi Maduro actualmente ta siguiendo nan estudio di OGM na Universidad di Aruba.

Nan ta skirbi algun articulo tocante e diferente aspecto cu tin di haber cu e bida empresarial y di e consumido, p’asina informa e lesado nan mas tocante e tema nan aki. Nos meta ta pa comparti conocemento y conscientisa pueblo over di e topico nan cu riba termino largo por conduci na un miho relacion entre e dunado di trabou y trahado, pa crea un actitud di trabou mas positivo. 

E articulo aki ta nan prome articulo titula “Prolongacion di Verlof di Paternidad na Aruba”.

Nacemento di un ser humano ta algo hopi bunita. Un mama ta carga un baby den su bariga pa nuebe luna y na momento di parto ta trece un criatura na mundo. Despues di parto un baby ta completamente dependiente di e cuido di un adulto, y pa e motibo aki ley ta ofrece e mama un total di 16 siman di verlof di maternidad. Pa un mama tambe e periodo despues di parto ta uno hopi pisa, e mama ta keda sensibel y delicado, y e tambe mester di ayudo y cuido. 

Na Aruba nos conoce verlof di paternidad, pero esaki ta solamente 2 dia. Na january 2019 Hulanda a prolonga verlof di paternidad di 2 dia pa 5 siman. Kisas si Gobierno di Aruba tin mas comprondemento tocante e importancia di verlof di paternidad, y e beneficionan di esaki, Gobierno di Aruba por considera duna un prolongacion di verlof di paternidad. Asina e tata tambe por tey pa duna soporte na e mama y disfruta e momento bunita aki cu su baby recien naci. 

Investigacion haci ta indica cu verlof di paternidad tin diferente efecto positivo, entre otro, un miho conexion entre tata y yui, tambe ta fortalece un miho relacion entre e famia. Mama tambe ta beneficia di esaki pa loke ta trata su salud mental despues di parto. Despues di parto, un tata cu ta yuda na cas cu e baby, lo por yuda preveni cu mama ta haya depresion post-parto (postpartum depression). Depresion post-parto por presenta di ora e baby nace te cu 4 siman despues di parto. Depresion post-parto por tin consecuencianan negativo pa mama, baby of famia completo. Por ultimo, ofreciendo e derecho di verlof di paternidad pa un periodo mas largo na e tata tambe lo yuda sera e diferencia di igualdad entre hende homber y hende muhe unda tur dos por disfruta mas tanto posibel cu nan baby recien naci. 

Pa conclui nos por deduci cu prolongacion di verlof di paternidad aki na Aruba lo conduci na efectonan positivo pa tata,baby y mama. Pa e motibonan aki lo ta bon si Gobierno di Aruba por tuma esaki na consideracion.