Relaciona cu ladronicia: Dos detencion y dos arma di candela confisca durante entrada hudicial

Comunidad pa basta tempo afecta pa kiebro y ladronicia cometi den area di San Nicolas. Un investigacion a inicia y for di akinan a yega na algun sospechoso cu tabata cuadra cu descripcion. A bin saca afo cu nan tabata uza e mes un modus operandi, cual tabata di drenta via e dak.

En conexion cu e investigacion aki, recherche di San Nicolas, hunto cu e team di woninginbraken, a tene un entrada hudicial diahuebs mainta na un cas na Essoheights.

Un sospechoso a keda deteni na e cas aki. Ta trata di Q.K., naci na Aruba di 22 aña biba na Essoheights San Nicolas. Na dicho a cas a bin confisca un arma di candela.

Relaciona cu e mes un caso di kiebro y ladronicia, a haci un otro entrada hudicial na un cas na Bushiri. Aki tambe a haci un detencion, di sospechoso O.J.V.T.P., naci na Aruba di 23 aña. Aki tambe a confisca un arma di candela. Polis ta informa den nan comunicado cu no ta descarta cu lo bay tin mas detencion relaciona cu e caso aki.

Pa Cuerpo Policial por sigui resolve mas caso, ta pidi cooperacion pa yega na informacion di pueblo di Aruba. Ta enfatisa cu ta hopi importante cualkier informacion adicional cu por ricibi, p’esey ta pidi si tin cualkier informacion pa yama e tiplijn di Polis cu ta: 111-41. Cuerpo Policial ta garantisa cu e persona cu manda su tip, lo keda anonimo.