Presidente di Parlamento
Sra. America-Francisca
Wilheminaplein 4
Presente
Kòrsou, 17 di novèmber 2022
Tópiko: REKORDATORIO REUNION ‘Deliberashon ku Fundashon Kas Popular’
Apresiabel sra. Presidente America-Francisca,
Riba 1 di sèptèmber último frakshon di PAR a hasi petishon a base di artíkulo 64 di reglamentu di òrdu un reunion públiko pa deliberá ku Fundashon Kas Popular i minister responsabel pa bibienda sr. Charles Cooper.
E reunion aki a keda pidí despues ku Fundashon Kas Popular por medio di un LOI a mustra intenshon pa traspasá edifisionan pa un terser, di un forma bastante straño. Durante e reunionnan aki a bin diferente punto dilanti, entre otro e difikultat enorme ku FKP tin pa hiba un maneho responsabel, sin e sifranan anual i mensual korekto. Segun e direktor finansiero e situashon ta ‘Out of control’.
Resientemente suskrito a tuma nota di un anunsio ku Fundashon Kas Popular a pasa ofer pa benta di kas den findishi. Dùs den algun luna di tempu, e maneho di FKP a pasa di 1. ‘Huurkoop’, pa 2. Benta i awor 3. Subasta ala findishi.
Esaki den término di algun luna. Sra. Presidente suskrito tin reservashon serio pa ku e maneho di propiedat ku FKP ta hibando. Sigur teniendo kuenta ku FKP no tin su finansa na òrdu, na e momentonan aki. I na final di dia, si algu pasa e fundashon aki, e propiedatnan aki ta pasa pa Gobièrnu, dùs pais Kòrsou.
Pa e motibunan aki suskritonan ta haña di vital importansia pa deliberá ku e minister responsabel sr. Cooper, tokante e desaroyonan preokupante na FKP, ku tin su efekto riba desaroyo di bibienda aki na Kòrsou, promé ku e Subasta, ala findishi aki tuma lugá. Suskrito ta pidi sra. Presidente pa yama e reunion públiko ku a ser pidi 1 di sèptèmber mas pronto ku ta posibel, pero sigur promé ku 15 di desèmber próksimo, pa asina Parlamento por deliberá ku e minister, promé ku ta lat.
Danki di antemano,
Ana Maria Pauletta
Miembro di Parlamento, Partido Alternativa Real
