Reconocemento special pa dos polis cu a salba bida di un baby

Recientemente na Centro di Husticia na Santa Cruz a tuma lugar un reconocemento na dos agente policial pa cu un incidente cu a tuma luga dia 18 maart 2022.

Ta trata aki di agente policial Henry Nuñez Bahamón y Wesley Willems. Altocomisario suplente Irma Gordon a elogia y gradici e dos agentenan door di a actua lihe pa por a salba bida di un criatura dia 18 di maart 2022. 

Ta asina cu e dos agentenan a conta cu e dia encuestion nan tabata riba patruya y pasando banda di Linear Park, un señora a acerca nan. E señora ta informa e dos agentenan cu tin un baby cu a bira hopi malo banda di lama y no ta halando rosea bon. Na sitio e agentenan ta topa cu un grupo di hende cu ta rondonando un baby. Di biaha ta puntra si a pone ambulance na altura, di cual ningun hende no por a duna un contesta. Mirando cu e baby no tabata reacciona, e dos agentenan  di biaha a dicidi di pone e baby den patruya pa asina transporte cu maximo urgencia pa hospital. 

Patruya a informa central di polis y a pidi pa yuda habri caminda pa por yega mas lihe posibel  hospital cu e baby. Den e patruya e agente policial Willems tabata duna e baby CPR na unda dado momento e baby a cuminsa reacciona. Na yegada na hospital e personal di EHBO tabata wardando nan y asina a tuma e baby over pa sigui dun’e asistencia medico necesario y a logra salba bida di e criatura.

Di parti di Cuerpo Policial Aruba , Altocomisario suplente Gordon a duna cada un, un reconocemento pa cu e acto bunita aki. Cuerpo Policial ta orguyoso di e dos agentanan policial Bahamón Nuñez y Willems.

Danki pa e reaccion rapido y asina a salba bida di un criatura. Nos ta orguyoso di boso.