Raymond Kamperveen (RAIZ): Mester cuminsa haci algo pa nos pais

Diamars Aruba a celebra otro apertura di Aña Parlamentario. Manera semper 24ora.com/TREMPAN tambe tabata t’ey pa trece tur e acontecimentonan aki pa su lesadonan.

Su Excelencia Gobernador di Aruba, Alfonso Boekhoudt, den su discurso a trece un mayor enfoke riba nos mucha-, hoben- y adultonan mayor. Sigur un parti di su discurso cu a hala atencion di parlamentario Raymond Kamperveen (RAIZ) cu a bisa cu durante e dos añanan di pandemia, e parti aki di comunidad a sufri hopi,  vooral di salud mental y cu lo mester traha duro riba esey. Apart di economia, di cierto cosnan cu mester mehora, esaki ta algo cu Kamperveen kier pa trece atencion p’e. No ta solamente e persona ta sufri, pero henter e famia ta sufri di e parti aki.

Un otro punto cu Kamperveen a trece dilanti, ta e parti di sushedad na Aruba. Riba esaki el a indica cu Minister Arends mester trece mas solucion pa cu e problema aki. E lo kier wak un solucion, pa nos yiunan, recicla, kico cu ta. Circular economy, cualkier cu e ta pero mester cuminsa haci algo pa nos pais. Aruba ta un pais asina chikito, pa ta susha asina hopi.

OBHETIVO

Pa loke ta su obhetivonan, Kamperveen a bisa un di su obhetivonan mas grandi, ta e leynan di e iniciativanan nobo, esun entrega door di su colega, Misha Raymond, tocante Kiesverordering. E mest ta bezig con pa inculca mas creatividad riba tereno di deporte, arte y musica den e scolnan. Si haci esaki, e mente lo ta mas activo y creativo, cu lo haci cu e mucha lo siña bon na scol.

HYDROGEN

Esaki ta algo cu e ta kere den dje. Hydrogen ta tur rond di Europa, no por sigui biba asina. Aruba cu tin e biento duro, e solo mester probecha di esaki. Si WEB, ELMAR y Utilities traha hunto, e lo ta na beneficio di Aruba.

Por ultimo, Raymond Kamperveen, a bisa cu mester ta consciente cu no por bay 100% over riba energia sostenibel, pasobra cu esaki lo bira mas caro. Por bay pa 60, 75%. E mester por ta pagabel pa e comunidad di Aruba.