Ramon Todd Dandaré: Enseñansa ainda ta carga consecuencia di sclavitud

Linguista Ramon Todd Dandaré, kende awendia ta un pensionado, tin varios conexion cu disculpa cu dialuna mainta Prome Minister Hulandes Mark Rutte a ofrece na, entre otro Aruba pa e pasado di sclavitud. Fuera cu e ta un descendiente directo di catibo, Dandare a manda carta pa gobierno Hulandes pidiendo e disculpa formal y como educador, ta testigo di consecuencia cu sclavitud ainda tin den e sistema di enseñansa; tur motibo pa cual e tabata un di e invitadonan na e presentacion.

Aworaki Dios gracia cu nos ta papiando di dje, pero tempo cu nos a bay scol, nunca nos a siña di sclavitud, nunca nos a siña di nos indjannan Caketio. Loke nos tabata haya na scol ta loke nan tabata yama vaderland geschiedenis, e historia di Hulanda y Europa, pero no nos propio historia. Esey ta loke a pone Aruba ta nenga cu tabatin catibo, mientras cu si tabatin,” Dandare a comenta.

Dandare no sa si ta door di berguensa of door di e propio manipulacion di conocemento, bo ta haya cu na scol, a keda ultraha tambe nos propio idioma Papiamento cu a nace door di sclavitud, door di e trafico di catibo. “No a haya nos Papiamento na scol y ainda nos ta luchando pa Papiamento haya su luga den enseñanza.Papiamento ta un lenga completo y mester wordo duna na scol. Esey ta loke mi ta yama e resultado y consecuencia di henter e historia di colonialismo y di sclavitud di Hulanda pa cu Aruba,” asina e linguista a finalisa bisando.

Pa e relato completo, lesa edicion di TREMPAN