Quota Club a haci entrega di premio maximo n’e ganado dje Picnic Dansant

Recientemente, dia 27 di november ultimo, Quota Club tabata tin nan fundraising Picnic Dansant. Meta di e picnic dansant aki pa Quota tabata un oportunidad di duna bek na comunidad a traves di diferente causa cu e organisacion ta dedica na dje. Placa recauda ta repartie bek entre diferente instancia.

Na final, e tabata un evento sold-out, cu mas di 500 hende cu a participa y a celebra cu Quota e picnic dansant Back to the 80’s, segun Ivy Simmons-Hernandez, miembro activo y miembro di directiva di e Picnic Dansant. E evento tabata hopi importante pa Quota Club, ya cu despues di dos aña, hopi di nan fondonan a baha. Simmons a duna danki na tur esunnan cu a coopera cu nan, e participante- y tambe e comerciantenan cu a coopera pa un premio na e ganadonan.

Pero diahuebs, Quota Club a haci entrega di un bon na balor di mil florin, cortesia di All to Car, pa asina e ganado por bay busca un bais.

Pa loke ta e fondonan recauda durante e evento aki, na luna di maart, Quota Club ta manda pidi e jaarverslag di varios instancia y asina lo evalua pa asina duna un contribucion unda cu por. E fondo recauda ta parti esaki den tres parti. Na prome luga nan ta traha cu instancia cu ta conscientisa mas tanto n’e cuido di oido, unda cu FEPO ta bin na prome luga. Na di dos luga, ta bay den educacion y di tres  e fondo ta bay den comunidad. Y e ora cada instancia ta ricibi loke nan tin na fondo.

Si durante aña, tin cualkier comerciante cu lo kier yuda Quota Club of Aruba c’un donacion, maske con chikito cu esaki por ta, e lo ta mas cu bon bini. Asina Ivy Simmons, di Quota Club a finalisa bisando.