Purbando di huy pa Hulanda: A detene Joanne Jacopucci na aeropuerto

E ta conoci caba den pasado pa su estafanan! Asina mes el a logra pasa screening y a bay traha na Cooperativa di Ahorro y Prestamo Aruba (CAPA). Ey nan ta maneha fondo di miembronan di SEPPA cu ta spaar y fia. Y el a probecha pa horta y awe a purba huy. Pero a faya den su intencion di scapa y burla di husticia Rubiano.

A haya informacion cu e tabatin intencion di bandona Aruba pa asina burla di husticia riba e sospecho cu tin riba dje. Ta sospech’e di lo a malversa alrededor 200 mil florin di spaardo di CAPA. A logra descubri esaki y haci un denuncia. E tabatin apenas un aña trahando.

24ora a publica e noticia di malversacion sin menciona nomber. E siman cu a publica net Joanne Jacopucci a yega di un vakantie completo y luhoso cu su pareha. Dimes cu placa di CAPA probablemente cu e lo a malversa. Tabata warda e momento di detencion pa asina pone e foto y nomber.

Joanne Jacopucci conoci di husticia kier a bandona Aruba cu su yiu. Na aeropuerto a tira man riba dje. E no a tene cuenta cu tabatin un ordo di detencion y e luz a cende ora e kier a bandona Aruba pa no bolbe mas. E yiu por a sigui su so pa Hulanda pero Joanne Jacopucci si a keda y lo pasa anochi den cel di un warda di polis.

Por spera mas detencion. No ta kere cu Joanne Jacopucci so por a logra malversa e suma grandi di 200 mil florin sin yudansa di otro.