Pueblo kier gobierno bin cu solucion pa aumento den tarifa di awa y coriente

Awa y coriente ta aumentando. A acerca parlamentario, minister incluso sindicalista riba e aumento aki. Pero pueblo tambe a vocifera nan preocupacion riba e situacion aki y ta haya cu e no ta nada facil pa nan.

Juancho ta un ciudadano preocupa p’e aumento di awa y coriente. El a bisa cu esaki ta algo hopi duro, pasobra a bin cu molina, a bin cu hopi plan pero ningun ta haci nada. E coriente no ta baha. Lo unico e por haci ta sigui paga. Juancho ta un pensionado y tin di lucha cu loke e tin. Cos no ta bay facil mas.

Edilio a bisa cu diripiente hende ta spera algo y diripiente cos ta subi drasticamente. E porcentahe ta hopi pa pueblo sigui soporta e consecuencia cu awa a subi. Tin di bay cremencha, pasobra mester haci menos uzo di awa pa mata. Pa loke ta coriente e ta kere cu mester paga esaki, pero mester cremencha. E ta haya cu e situacion aki ta bay afecta e pensionadonan.

Jose Almonte a bisa prome cu tur cos esaki ta algo mundial. Pero si gobierno ta bay pone un stop algo cu no ta asina halto di tarifa, pasobra salario ta keda mesun cos. E ta di pensamento cu gobierno ta bay pone un subsidio of algo p’e coriente y awa. 

Armand Alcidor tabata na trabou ora cu su señora a yam’e y inform’e cu a cera awa. El a presenta pa mira si por haci un areglo di pago pasobra e no por biba di awa. Su situacion a conduci na esaki door di Covid, desde hopi aña. E kiermen hende ta muri na Aruba. Bandera so ta subi y baha, tur cos ta subi bay ariba. Dia pa dia e ta bira mas dificil, tur cos ta subi y e placa semper ta baha.

Alitia Francis ta pensa cu no ta bon, pasobra e recibonan ta subi y e salario ta keda mesun cos. Esey no ta algo. Pa baha gasto, mester haci uzo di menos. Pero di uza menos mes ainda nan ta cobra bo. E ta haya cu e no ta sentido. Francis ta cobra pensioen y ni esey ta yuda. E pensioen no ta yega pa paga su recibonan, pasobra e tin awa, telefon y coriente. Tin biaha e ta bay na recibo so. E ta di pensamento cu gobierno tin di haci algo, manera cobra pueblo menos p’e recibonan. Gobierno ta esun encarga, no e pueblo cu no por haci nada.

Dion Lutter a bisa cu esaki ta un inconveniencia y e no sa kico pa haci. Cu e situacion aki e ta kere e mester sali menos. E ta un entrepreneur y ta dificil caba cu tur dia mester draai cu e economia. Tambe e ta kere cu mester siña biba cu esaki. Pero e realidad ta cu e mes no sa kico pa bisa, y simplemente e ta purba draai, spaar un tiki mas. Incluso purba gasta menos. Den comparacion cu Hulanda, eynan tur cos a bira caro. Tambe a bira mas dificil.

Anthony Wolf a bisa cu mester bay traha duro riba budget pa cremencha. E situacion aki ta di mas. Como cu e ta algo complica, e ta kere mester bay corta un caminda, sea den un cuminda of algo. E placa ta net conta y asina fin di luna yega, tin cos paga y e no ta yega. Si tin un solucion pa evita esaki, su persona no sa cu kico nan por bin cu ne. Pa hinc’e den pueblo, e ta di pensamento cu tabatin otro caminda pa cana.

Señora Hoek a bisa cu mester corda riba e pensionadonan. Specialmente riba esunnan cu ta pensiona, pasobra mester corda cu e placa ta grap y no ta yega. Awo mester corta un caminda, por ta come menos saludabel pasobra tur cos a subi.