Diasabra atardi pa anochi a tuma luga Kidspreneurs Christmas Bazaar riba Plasa Daniel Leo, cual tin di indica cu un cantidad grandi di persona a bishita. Bastante mucha y hoben a sa di pone nan stand unda cu nan por a bende nan mercancia, sigur un estimulo pa nan sa kico ta un empresario.
Minister di Asuntonan Economico demisionario, mr. Geoffrey Wever, a comenta cu ta parti di un trabao cu nan ta haci pa stimula e hobennan pa ta empresario. Nan ta organisa diferente curso na Departamento di Asuntonan Economico y unidad IDEA. Ta organisa tayer pa siña e hobennan con pa bira empresario pa stimula e mind-set aki pa por stimula nan. Pa diasabra anochi a invita nan pa e ora den e evento aki, nan expone loke nan ta produci y traha, stimulando nan mind-set empresarial pa e dia di mañan nan bira empresario.
N’e mesun momento ta purba naturalmente atrae nos hendenan den centro di ciudad, combinando dos area di maneho y esaki ta pa duna contenido n’e centro di Oranjestad. Gobierno ta inverti den infrastructura: Wilhelminastraat, Columbusstraat, luz nobo, etc., edificio nobo, renoba monumento, treciendo e departamentonan bek pa trece e fluho di hende, pero mester tambe e contenido. Esaki ta tipo di contenido cu kier crea, caminda cu e hobennan ta haya espacio pa por expone na productonan, stimula nan y trece nos hendenan bek den centro di Oranjestad.
Algun siman pasa ATA a organisa e evento Autentico, cu tabata un evento hopi exitoso y algun siman pasa a organisa riba Plasa Comercio un evento caminda e productornan local por a bende nan productonan. Y finalmente diasabra tabatin esun di e hobennan. Semper ta kere pa stimula e hobennan pa nan ta eyfo, stimula nan den cos nobo y siña nan con pa bira empresario, cual ta un meta cu e ministerio tin, ilustrando e exito di e evento. E minister ta spera cu asina aki por duna contribucion n’e hobennan y tambe n’e centro di ciudad.
E evento aki dura te cu 9:00 pm. Tabatin entretenimento, co’i hunga p’e hobennan. E minister a splica cu aña pasa a haci inversion grandi pa luz nobo, decoracion nobo, pa trece un ambiente diferente y awo por a mira e cosnan aki a cuminsa atrae hende y cuminsa cana.
E mandatario ta content pa mira esaki, pero e trabao no a caba. Awo mester sigui cu tipo di idea pa atrae nos hendenan den Oranjestad.
E minister a pasa na varios mesa riba e plasa, pasa wak y combersa cu e hobennan, p’asina nan cont’e con nan a yega na nan producto, con e negoshi ta bayendo.
Tin diferente idea bunita y e minister ta contento con e hobennan ta envolvi tambe den e parti aki.
Comment