PSV y Boneiro ta bay traha intensivamente hunto

Durante e dos temporadanan venidero PSV y Boneiro ta bay traha intensivamente hunto. PSV ta bay cuminsa cu entre otro actividad di Soccer School na Boneiro, cu ta un munisipio special di Hulanda den area Caribense. E club ta bay duna formacion ta entrenadonan local tambe. Banda di esey PSV ta bay comparti conocemento tocante actividad di ‘start-up’ y ‘scale-up’.

Actividad di futbol

Boneiro kier desaroya su mes socialmente y economicamente y pa esey activamente nan ta busca colaboracion na Hulanda. Gobierno di Boneiro ta mira den PSV un partner cu por sostene e isla. Na Boneiro PSV ta cuminsa entre otro cu actividad di futbol. E club ta bin Boneiro cu Soccer Schools pa laga e muchanan cera conoci cu e vision unico di PSV Academy. Ademas coachnan di PSV ta bay prepara entrenadonan local. E expansion di actividadnan pa Boneiro, ta parti di e strategia di internacionalisacion di PSV. Esey ta dirigi su mes entre otro riba creacion di actividad y visibilidad na Norteamerica, Centroamerica y Suramerica.

Balor economico  

Cu sosten di e asociacion cu Brainport, banda di actividad social y di futbol, PSV ta bay comparti conocemento tocante desaroyo di startup y empresanan scale-up. Den e region di Brainport, High Tech Campus Eindhoven ta un incubador pa empresanan nobo y empresanan cu ta creciendo den e sector tecnico. Un incubador ta yuda empresanan nobo of existente cu inicio y desaroyo di nan actividadnan empresarial. Banda di esey, un incubador ta sosten entre otro cu alohamento, entrenamento di gerencia y acceso na financiado y cu trabou di red. Na luna di juni Boneiro mes a crea un incubador comercial cu cua ta sostene startupnan local den e areanan menciona. 

Crecemento  

Nick de Graaf, manager di benta internacional di PSV ta bisa cu durante e temporadanan venidero, e club ta biaha cu diferente delegacion pa Boneiro. “E escoho pa Boneiro ta strategico pa tur dos partido. Nos ta convenci cu nos por yuda Boneiro economicamente y socialmente cu nos actividadnan. Banda di esey nos ta dispone di un red grandi cu activamente nos ta bay laga cera conoci cu e posibilidadnan cu Boneiro ta ofrece riba tereno comercial”, asina director comercial Frans Janssen aa agrega: “Cu e cooperacion aki, mas hende ta bin den contacto cu nos y nos vision. Cu esey nos ta haci nos alcance y e impacto di PSV den mundo mas grandi.”

Desaroyo duradero

“Esaki ta cuadra cu esfuersonan di Entidad Publico Boneiro den cuadro di diversificacion di nos economia,” segun diputado Hennyson Thielman di Desaroyo Economico na Boneiro. E ta sigui, “E coneccion di PSV cu Brainport y nan aspiracion continuo pa alcansa ‘E Siguiente Nivel’ ta cuadra cu nos vision y ta un prome paso den direccion di un desaroyo economico duradero pa Boneiro.” 

Boneiro ta dal pasonan concreto pa desaroya su mes socialmente y economicamente y pa esey nos ta en busca di partnernan strategico na Hulanda. “Entidat Publiko Boneiro ta mira den PSV un partner cu por sostena nos isla,” segun diputado James Kroon di Deporte.