Proximamente Ady Thijsen lo huramenta na Hulanda

Varios parlamentario, durante reunion publico den Parlamento dialuna ultimo pa trata e Nota di Fin di Aña 2022, a haci diferente pregunta na Prome Minister Evelyn Wever-Croes pa loke ta trata nombracionnan pendiente. Prome Minister a contesta esaki indicando cu cada un tin e debido atencion di Gobierno di Aruba. 

NOMBRACION DI ADY THIJSEN:

Nombracion di Ady Thijsen como Minister Plenipotenciario na Hulanda ta den su fase final y pronto lo manda tur informacion pa Parlamento. Thijsen ta e prome funcionario cu a pasa un screening segun e ley nobo di screening, e ley cu Parlamento a bin cu ne. Un ley, cu segun Prome Minister, mester aplica p’e parlamentarionan tambe pa asina elimina e sospechosonan y esunnan riba blacklist di Merca for di e Parlamento. E ta un procedura di screening mas intenso y ta rekeri cu Prome Minister manda un reportahe di e screening pa Parlamento. Proximamente Ady Thijsen lo huramenta door di Rey Willem Alexander na Hulanda.  

NOMBRACION GEVOLMACHTIGDE MINISTER WASHINGTON 

E periodo di e Gevolmachitigde Minister na Washington ta yegando su final. Awo ta den proceso ainda pa e nombracion di un siguiente candidato y mientrastanto a prolonga e nombracion di Joselin Croes te fin di aña pa wak si nos ta keda cla e ora. 

NOMBRACION DIRECTEUR DBB

E proceso pa cu directeur nobo di Directie Buitenlandse Betrekkingen (DBB) ta andando. Aki tambe tin un comision independiente institui cu tin cu duna Gobierno conseho. Prome Minister a expresa su deseo cu pronto haya un director nobo pasobra e directeur actual, Abath lo ta bahando cu pensioen prome cu fin di aña y mester un persona pa reemplace.