PROTEKSHON PA OIDO

Usa Protekshon pa Oido durante di aktividatnan karnavalesko

Curaçao Quota Club di bishita serka Minister Sithree van Heydoorn

 Willemstad –  Den kuadro di Karnaval Curaçao Quota Club ta hiba un kampaña pa kuido i protekshon di nos oido. P’esei e direktiva tabata di bishitá serka Minister di Enseñansa, Siensia, Kultura & Deporte sr. Sithree van Heydoorn. Nan a kombersá tokante di e importansha di oido di hende pero enpartikular di muchanan.

Ta importante pa indiká ku durente di e marchanan Gobièrnu tin momentunan ku ta kontrolá e desibel di sonido. Pero ta sumamente importante pa usa protekshon pa oido. Paso nos oreanan ta hopi sensibel pa sonido i den kaso ku esaki ta hopi duru nos por hasta pèrdè nos oido. Ministerio di Salubridat Públiko, Medio Ambiente i Naturalesa na nòmber di Gobièrnu ta hasi e kontròlnan. Tene kuenta ku durante di marcha di mucha e sonido por yega te ku 90 desibel i pa e otro marchanan esaki por yega te ku 103 desibel.

P’esei Minister di Enseñansa, Siensia, Kultura i Deporte sr. Sithree van Heydoorn ta pidi tur suidadano pa ban demostrá sivismo i partisipá aktivamente den e kampaña di konsientisashon pa nos kuida nos oido i usa protekshon. Ban kuida oido di nos mes pero speshalmente protehá oido di nos muchanan durante aktividatnan karnavalesko.

—

KOMUNIKASHON

**riba e potrètnan por tuma nota di e bishita i momentu di entrega di e protekshon di oido na Minister sr. S. van Heydoorn.