Proposicion: Duna tata cinco dia liber ora su yiu nace

E hende homber cu bira tata tin derecho riba dos dia di vakantie di paternidad, segun ley. Den su ultimo conseho na gobierno, Sociaal- Economische Raad (SER) a propone pa amplia e cantidad di dos pa cinco dia di vakantie di paternidad. Recientemente Minister di Asuntonan Economico, Comunicacion y Desaroyo Sostenibel, mr. Geoffrey Wever a ricibi bishita di Sociaal- Economische Raad cu a duna un splicacion amplio over di e conseho “Uitbreiding Vaderschapsverlof.”

Desde aña 2013, articulo 629b di e Bugerlijk Wetboek Aruba, ta duna e trahado (den sector priva) masculino cu bira tata dos dia di verlof di paternidad cu pago di salario. Esaki tambe ta e caso pa e trahado masculino cu ta ambtenaar.

SER ta menciona cu segun diferente investigacionnan internacional, ampliacion di e cantidad di dianan cu di vakantie di paternidad lo trece beneficionan pa e mucha, e pareha, e dunado di trabao, e hende homber y comunidad en general.

E conseho a indica cu ta importante pa amplia e vakantie di paternidad pa yuda famianan cu ta expande. Ta duna tata e oportunidad pa participa activamente den cuido di nan yiu y tambe yuda mama pa recupera despues di duna luz. Ampliacion di e dianan liber di paternidad tambe ta yuda pa promove igualdad di genero den hogar y trabou.

E beneficio pa sociedad ta inclui un miho bienestar pa e famianan y yiunan, un relacion mas fuerte entre tata y yiu y un disminucion di stress y ansiedad den cas. Pa empresanan, esaki por yuda pa mehora e productividad y retene personal talentoso. No solamente esey, e extension di dianan liber di paternidad tambe tin un impacto positivo riba e salud di mama y yiu. Ta duna tempo amplio pa e tata yuda e mama pa haya mas tempo pa recupera despues di duna luz y tambe ta yuda pa mehora e atencion y cuido pa yiu.

Tambe diferente stakeholders na Aruba ta di opinion cu expansion di verlof di paternidad tin su beneficionan. Basa riba e beneficionan pa famia y comunidad SER ta propone pa expande e verlof di paternidad na cinco dia. E conseho di SER over di expansion di dianan liber di paternidad ta banda di un tema actual, tambe uno di mayor importancia pa igualdad segun Minister di Asuntonan Economico, Comunicacion y Desaroyo Sostenibel, mr. Geoffrey Wever. E beneficionan menciona ta demostra e importancia di un sociedad inclusivo. Un sociedad inclusivo den cual cada un di nos tin e mesun derecho y oportunidad di participa y biba segun nos potencial y metanan.

Minister di Asuntonan Economico, Comunicacion y Desaroyo Sostenibel, Geoffrey Wever ta gradici SER pa e conseho “Uitbreiding Vaderschapsverlof”, un conseho cu lo contribui pa traha maneho pa stimula igualdad di genero cu ta un fundamento esencial pa ta un pais inclusivo.