PROMÉ MINISTER GILMAR PISAS A REUNÍ KU DIREKTOR I SEKRETARIO GENERAL DI KONSEHO SOSIAL-EKONÓMIKO
Willemstad – Promé Minister Gilmar Pisas a reuní ku direktor i sekretario general di Konseho Sosial-Ekonómiko (SER) sr. drs. Raul Henriquez dia 9 di sèptèmber 2022.
Durante di e enkuentro di trabou aki a interkambiá riba diferente aspekto institushonal, organisatorio i tambe hurídiko ku ta rekerí koperashon di Gobièrnu, pa asina e órgano di konseho fiho aki, ku tin su base den lei, por sigui ku e trayekto di profeshonalisashon i sigui alsa nivel i kalidat di e konsehonan i estudionan ku ta saka regularmente pa Gobièrnu i Parlamento riba temanan di karakter sosioekonómiko i sosiolaboral.
Konsiderando e aspektonan hurídiko, Promé Minister sr. Pisas a ser respaldá durante di e enkuentro aki pa direktor di Direktorado di Legislashon i Asuntunan Hurídiko (WJZ) di Gobièrnu sra. mr. Jeniffer Fer.
Promé Minister sr. Pisas a duna su sosten na e trayekto di profeshonalisashon ku ta tumando lugá na SER i a aploudí e inisiativanan konkreto.
Representantenan di sektor laboral, sektor komersial-empresarial i ekspertonan independiente ta keda representá den SER.
E enkuentro a tuma lugá den un esfera ameno i konstruktivo, kaminda a repasá algun punto konkreto i relevante riba nivel institushonal i organisatorio.
